傑志和富大埔行善爭盃

「2018香港賽馬會社區盃」今日於旺角大球場上演「3料娛樂」,主賽下午5時30分上演,由傑志對和富大埔,雙方主帥異口同聲表示,希望藉今仗寓賽於操及試陣,同時亦會盡力爭勝,為其代表的受惠慈善機構爭取更多善款。主賽前加插的「2018香港賽馬會女子青少年社區盃」及「香港賽馬會少年社區盃」,on.cc東網及香港賽馬會青少年足球發展計劃YouTube頻道,將會同步直播。

催谷狀態 朱志光或作輪換

由於「山竹」襲港,傑志除對富力R&F的聯賽被逼延期外,其訓練中心於短期內更無法運作。主教練朱志光稱,球隊目前已轉往位於將軍澳的賽馬會香港足球總會足球訓練中心進行操練,並指慶幸上仗對東方龍獅能於完場前扳平︰「好彩球員冇受操練地點改變而受影響,自己都明白呢啲因素或多或少會影響心理。上仗捱過冇輸到,對球員心態嚟講係件好事。」他補充近期不少球員缺乏上陣時間,不排除今仗會作出調動︰「有啲球員需要比賽狀態,可能會作出輪換,我哋隔咗好耐冇波打,有啲球員係多過1個月冇上陣,我希望畀佢哋落場。當然都會盡全力贏呢個盃,因為受惠機構得到嘅錢會多啲。」

堅Sir:爭勝之餘想試新嘢

9日內迎來第3戰的和富大埔,主教練李志堅希望贏波之餘,同時達到試陣效果︰「我哋第1次打呢個盃賽,當然想贏,但都會諗吓有冇空間去試新嘢?要平衡到件事之餘,都唔想球迷覺得呢場波係場友誼賽,始終都有個錦標去爭。」對於球隊的防守問題,「堅Sir」坦承要對症下藥︰「隊波嘅入球能力唔錯,嚟緊嘅工夫就要着眼防守,近期球隊嘅防守係喺領先後先出問題,睇吓有冇機會喺呢場波作出改善。」

頭場賽事下午3時先上演「香港賽馬會女子青少年社區盃」 ,由上季青少年聯賽冠軍車路士足球學校(香港)與青少年聯賽足總盃冠軍九龍木球會交鋒,之後下午3時50分鳴笛的「香港賽馬會少年社區盃」會由上季U13青少年聯賽盟主港會,火併U13青少年聯賽足總盃冠軍傑志。

何彥霆報道