魯殊「歡迎」寸王留隊

利物浦於新一季英超開局順利，就連近日訪港嘅「紅軍」名宿魯殊，亦對球隊表現讚不絕口，相反死敵曼聯近期風雨飄搖，領隊莫連奴承受巨大壓力，但魯殊在受訪中卻開腔「睇好」莫帥，看來這位射術精湛的傳奇前鋒，「心計」也不弱呢！

魯殊近日以利物浦名宿身份訪港出席活動，趁機與本報記者大談波經，母會利物浦今季大踢爭氣波，英超開咧4戰全勝，心情大靚的魯殊指其他球隊表現同樣要留意，當中就特別談到死敵曼聯近況。

曼聯開咧演出令人失望，領隊莫連奴飽受被炒壓力，但魯殊就「歡迎」寸王繼續教曼聯：「聯賽只係啱開始，我真心覺得佢係一位出色領隊。比起我踢波嗰陣，依家領隊輸一場波就好大鑊，壓力明顯更大，我認為喺佢帶領下，紅魔依然有機會入前4。不過講到整體實力，利物浦梗係更勝一籌！」

上季利物浦射手穆罕默德沙拿表現極度神勇，更打破魯殊所保持的「紅軍」單季最多入球紀錄，魯殊跟「利迷」一樣期待沙拿表現：「佢係一位好識得用腦嘅球員，走位亦夠飄忽，就算對手重點嘜佢，我相信佢都冇有怕。嚟緊我睇好佢可以擊敗C朗同莫迪歷，贏得世界足球先生殊榮添。」

年齡：56歲

曾效力著名球會：利物浦，祖雲達斯、列斯聯、紐卡素

重要獎項：

英格蘭頂級聯賽冠軍5次

英格蘭足總盃3次

英格蘭聯賽盃5次

歐冠盃2次

歐洲金靴獎1次

文：林卓臻