富力R&F「3000+」班費角逐港超聯
過去2季南下征戰港超聯的R&F富力，昨日宣布新季將易名為「富力R&F」，據廣州富力副董事長黃盛華透露，今季富力R&F班費約為「3000+」，視乎獎金有機會達4,000萬港元：「我哋希望成績有所突破，保守估計期望去到聯賽前三同盃賽冠軍。」
借陳俊樂踢上半季
富力R&F昨午「拉大隊」到廣州花園酒店會見傳媒，除多位新加盟的香港球員外，尚未列入球隊註冊名單的入籍港將高梵亦有出席。黃盛華表示，今夏於轉會市場表現活躍，是為了幫助年輕球員成長：「年輕球員留喺板櫈上唔易有進步，所以今季我哋再加大少少個力度，引入香港本地嘅強援，帶住內地嘅新秀一齊去踢，希望為呢班後生仔製造更多上陣時間。」
有關組軍方面，黃盛華稱最後一位外援人選已在物色中︰「因為基奧雲尼9月就會入籍，我哋已搵到一位歐洲中後場外援作替補，佢亦好快會到位。至於另一個名額就會再睇睇，預計會係中場球員。」
記招上另一焦點，就是剛出戰完雅加達亞運足球的陳俊樂，本身「樂仔」早前已加盟中超廣州富力，並隨隊集訓，惟新季他將會被外借到富力R&F，為期半季。「樂仔」坦言踢罷亞運後有點疲累，但仍希望把握這半季時間改善不足︰「中超節奏好快，經過試訓嗰一個月，其實係對自己一個好好嘅審視，睇下自己呢半年有乜嘢要加強，再爭取一個位置。」
黃盛華則表示，其實球會心儀「樂仔」已久：「其實留意樂仔都有1年半，本身佢2018下半年應該喺中超亮相，但佢要踢亞運又撞啱中超8月賽程好密，存在磨合問題，所以佢會等多半季先返去。佢係一位難得嘅好球員，富力都唔一定係佢最後一站，我哋都期望佢可以去到歐洲落班。」