列強新帥圍堵烏鴉 傑志朱志光:期待挑戰

新一季「中銀人壽香港超級聯賽」將於本周五開鑼,今季10路港超雄師除新軍凱景外,當中有5隊都進行了「易帥大行動」,目標非常清晰,就是希望可以挑戰由「最佳教練」朱志光領軍、上季「3冠王」傑志的霸主地位!儘管列強來勢洶洶,但近兩季合共為「藍鳥」奪得6個冠軍的「朱Sir」,依然淡定兼信心十足:「傑志要成為一支強隊,或者要畀人覺得你係強隊,就要接受挑戰!」

綽號「烏鴉」的「朱Sir」,去年在季前記者會上表示「睇唔到有對手」,結果不僅帶領傑志高舉3個錦標,季後自己更冧莊「最佳教練」。但在今季的新聞發布會上,他卻未有作出相近「分量」的言論,莫非……?「我舊年咁講係因為嗰陣太早喇,當時其他球隊都未有動態,始終都要開咗季先知。我話睇唔到有對手,個意思唔係話真係『冇對手』,而係有啲組班都未完成,我仲未睇得清啫。但係今季好唔同、好正面,好有列強爭霸嘅感覺,隊隊都加強咗實力。作為連續兩季攞咗6個冠軍嘅球隊,當然個個都會追住你嚟打,呢個係正常嘅。要成為強隊,或者令人覺得你係強隊,就要對呢啲挑戰充滿期待。」「朱Sir」謂。

對手愈強愈集中

雖然今季多隊都增兵兼易帥,「烏鴉」揚言已準備好迎戰連場挑戰,他說:「足球世界唔會有長勝軍,但喺我角度嚟睇,長遠係要提升球隊嘅實力同持續進步。足球比賽有贏有輸,最緊要係知道球隊有咩不足,無論喺人選、場上表現同各方面,都要有一個好嘅計劃。就算眼前挑戰好多,但我對傑志球員好有信心,對手愈強愈難打,我哋就愈集中愈有鬥志,呢一點係我哋嘅本錢。」

陳曉明出山 拍徒弟搞好理文

今年5月,球季尚未完結,理文會方已急不及待公布鴻圖大計,將新季帥印交到先後出任過香港及澳門足總技術總監的本港著名教練陳曉明手中,並由表現出色的「冠軍教頭」「達Sir」曾昭達擔任其副手,合組「師徒檔」領軍。「職業球隊需要成績去支持係無可厚非,但足球喺成個長遠建立都係一個表演事業,所以我第一日建立一隊波嘅時候,都會朝踢得亮麗嘅方向,着重一啲好睇又好食嘅打法,同令球迷讚賞嘅足球。一場半場因應戰術而沉悶係會,但長遠發展係要建立一支踢出悅目足球去贏波嘅球隊,呢個亦係我執教理文嘅目標。」另外,「曉明Sir」強調他身為一個土生土長的香港人,絕對不會盲目為了成績,而完全不去理會本地球員之感受,偏重外援或者入籍兵。

佳聯元朗撐「嘉諾Sir」青訓

上季靠「少帥」曾昭達一搔半世紀之癢,高舉「高級組銀牌」冠軍的元朗,季尾一度陷入散班風波,雖然最終「雨過天晴」但卻難逃主力四散之命運。但會方依然成功找來另一人氣少帥、執教港隊有不俗表現的郭嘉諾領軍,並由「Uncle」法比奧擔任其副手。「我已經準備好,之前一直等緊擔任球會主教練嘅機會,因為我知道如果要學多啲嘢,一定要透過港超聯球會主教練呢個位置先可以學到。『王生』(元朗會長王威信)好早就同我傾,我亦好快應承咗,因為佢重用年輕球員,同畀我繼續執教香港隊嘅青訓梯隊。對我嚟講,雖然辛苦啲,特別係因為我依家住將軍澳,每日來回元朗都差唔多120公里,雖然山長水遠但都係值得嘅。」

R&F富力聘「光Sir」爭標

組軍南下征戰港超聯的R&F富力,來到第3季終於將球隊帥印交到香港教練手中,新一季楊正光將帶領這支5千萬大軍,挑戰各大錦標!「今次係一個好難得機會,畀我去重新建立一支球隊,會方喺各方面都展示出無比雄心,希望喺新舊球員通力合作各展所長下,可以為港超聯帶嚟衝擊!傑志、東方龍獅同香港飛馬都係好有實力嘅球隊,要擊敗佢哋首先我哋一定要做得好好,希望喺盃賽方面攞到好成績,而聯賽就當然愈前愈好啦!」

香港飛馬靠少帥柏度加西亞

隨着楊正光過檔R&F富力,香港飛馬今公布由前傑志足球學院課程及教練培訓總監柏度加西亞(Pedro Garcia Diaz)擔任新帥,現年29歲的他,曾執教澳洲青年聯賽球隊,以及廣州恒大青年軍,即使今次乃首度執掌一隊,但他深信自己可以勝任︰「近兩年我都喺傑志工作,喺嗰度我有好多好朋友,但我哋都好期待可以喺場上面交手同擊敗對方。我對香港飛馬大軍好滿意,球員態度好好,新舊老幼之間亦好好氣氛,無錯今次係我第一次正式執教一隊,但我對自己好有信心。球隊上季有唔錯成績,今季有幾位出色嘅新兵,只要好嘅部署同逐場比賽去不斷改進,相信可以比上季更加成功。」

「牛丸」復出統領東方龍獅

曾成功帶領東方龍獅在港超聯登頂,兼且打入健力士紀錄大全、榮膺亞洲足協年度最佳女教練,以及本地「最佳教練」,萬千寵愛在一身的「牛丸」陳婉婷,豹隱一季後再獲會方委予重任,成為球隊主帥。多次表示要「重新出發」的「牛丸」,對回到熟悉的崗位未有太大感觸,但希望可以比之前有進步,她謂:「心情係有少少緊張,之前做主教練遇過好多高高低低,從中吸收咗好多經驗。上季專心讀Pro License,從中學到好多管理嘅技巧,希望呢啲可以令我今次再做主教練,可以比上一次做得更好。」