南韓加時險勝入4強
亞運男子足球尋晚上演4場8強戰，其中焦點大戰南韓男亞足火併烏茲別克男亞足，「太極小虎」憑大阪飛腳射手黃義助連中三元，喺法定時間逼和烏茲別克3比3。到加時戰，南韓再有後備上陣嘅黃喜燦喺完場前3分鐘博得12碼，再親自操刀一射中鵠，終為球隊鎖定4比3勝局，勇闖4強。效力熱刺嘅領軍人物孫興民爭取奪金免服兵役嘅美夢險過剃頭。
南韓今場擺出「4-3-3」陣式，前線由孫興民帶領，呢位26歲射手今場都交出1個助攻，表現對辦。至於烏茲別克由兩度落後到一度反超前3比2，只可惜最尾都功虧一簣，出局都算係雖敗猶榮。南韓贏波之後，將會同越南爭入決賽，後者喺另一場8強戰加時以1比0踢走敘利亞晉級。
日本4強火併阿聯酋
另邊廂，日本男亞足則靠效力日乙京都不死鳥前鋒岩崎悠人梅開二度，2比1打敗咗沙特阿拉伯男亞足，4強戰將會迎擊互射12碼踢走北韓嘅阿聯酋。