阿樂肥榮冰火術煉金
「冰火二重奏」成港單車隊男子麥迪遜賽最大武器，衝擊雅加達亞運！港隊大軍昨日於將軍澳香港單車館會見傳媒，除「牛下女車神」李慧詩強勢爭取衞冕外，港隊梁峻榮及張敬樂亦於強項麥迪遜出戰，「肥榮」笑言與「阿樂」性格「一冰一火」，以最強化學作用向金牌邁進！
今屆亞運落實將麥迪遜列為賽項，港隊曾奪世盃及亞錦賽冠軍，奪牌呼聲高唱入雲，不過梁峻榮表示不可掉以輕心：「其他國家會積極進攻呢個項目，日本實力都強，我們目標唔會只係獎牌，自己都想要金牌，因為與阿樂踩咗5年，港隊重心亦會放喺麥迪遜，長遠係2020東京奧運。」「肥榮」4年前初戰亞運，回想當時任何事都感新鮮興奮，經過里約奧運及去年全運會後，現時只保留那份衝勁，卻多了一份成熟。
與「阿樂」合作多年，「肥榮」形容二人關係奇妙，有如冰和火：「阿樂計數精準，平時較少發聲，但一用起力就好似雪崩，擋都擋唔住，佢突圍時有如排山倒海，訓練時就算我哋全隊都追不上。而我就較感性，一剎那如火般爆發，燃燒自己去衝線。」他又補充，兩人默契已達高層次，即時場上少交流，舉手投足亦知對方想法。
阿樂指同以前一樣咁勁
早前兩人於山西集訓時再拍檔，「阿樂」笑指效果「同以前一樣咁勁」：「現時狀態及體力都唔錯，心理上亦比里約時平穩。」「阿樂」同時會出戰公路賽，但他透露由於個人賽及計時賽有些少「撞期」，要待教練沈金康決定。
Sarah畀後輩貼士：全力放開去踩至於「車神」李慧詩（Sarah）今屆目標清晰，希望於競輪及爭先賽衞冕，豪言爭牌十拿九穩，然後再做好大師姐角色：「今屆多了很多『小朋友』，希望帶領團隊拎到佳績。貼士就係要全力放開去踩，成績靠天時地利人和，要準備好先把握到機會。」