雲格執教日本隊？靠害咩！
英國《每日郵報》等媒體爆料，精通日文等多國語言嘅「教授」雲格好大機會成為日本新領隊，唔知日本球迷開心定擔心呢？
有指日本足協新帥候選名單有奇連士文同雲格，不過佢哋首選係曾經執教名古屋鯨魚攞日職冠軍嘅「雲爺爺」，呢位68歲前阿仙奴教頭一直同日本足協關係良好，以往就曾介紹好友杜斯亞去做領隊。消息指雲格喺世界盃期間去到俄羅斯講波，已經同日本足協有過初步接觸，日本足協更開出長約以示誠意。
天才球星變人球
不過雲格仲係咪咁鍾意日本球員就好成疑問，因為佢掌管阿仙奴期間都曾經引入3位日本兵，包括2001年簽入中場稻本潤一，不過當時有韋拉、伊度、柏奴亞等在陣，稻本潤一只係喺聯賽盃試過正選上陣，聯賽從未亮相，一季之後就被放棄。
第2位係天才新星宮市亮，呢位飛快翼鋒喺日本踢緊學界賽事，已經畀雲格睇中招攬；17歲就登陸英超，好可惜佢只係踢過1場英超咁大把，大部分時間都係被外借去飛燕諾、保頓等唔同球會，將宮市亮嘅天賦糟塌。
第3位就係現役日本國腳淺野拓磨，佢前年由廣島三箭轉投阿仙奴，但雲格立即將佢外借去史特加兩季，今個夏天再被外借去漢諾威，唔怪得亞洲球員都唔希望跟隨雲格啦！