一拍即合！高美斯投冠忠南區
港超聯球會冠忠南區昨宣布成功羅致前鋒「Mr.Right」高美斯。主教練鄭兆聰（Ricky）透露：「喺馬高斯離隊後，我哋欠缺一位中鋒，而揀高美斯係因為佢之前喺香港踢過南華及香港飛馬，適應呢度嘅環境，加上我哋傾嘅時候佢都同我講好想返嚟香港踢，所以一拍即合。」
增援策略「生不如熟」
冠忠南區今夏一直積極增兵，早前已簽入卡拉錫、狄卡奧及迪亞高，現再加上高美斯，這4位球員均有征戰港超聯經驗，Ricky坦言增援策略為「生不如熟」：「過去我哋嘅外援都係透過經紀介紹，未必個個得，球會要冒好大風險，始終季中換外援會使多咗錢，倒不如搵一啲之前喺其他球會踢得好嘅球員，而且我哋搞手續都簡單啲。」在高美斯來投後，Ricky表示踢法及陣式未必會有大變動，惟需協助他與隊友建立默契。