俄烏激戰Show謝德謙估「窿窿」
主辦國俄羅斯今晚再度登場，同烏拉圭力爭A組首名，成個莫斯科氣氛Hot到爆！《東網》記者肥金專登搵嚟身處莫斯科的不同身份華人，為呢場大戰「把脈」！當然唔少得以最接近距離直擊世盃嘅Now TV評述謝德謙，「阿謙」賽前就畀料，話俄羅斯如再搵迪斯尤巴擔正，定必0比0收場喎！
今場「俄烏大戰」搵謝德謙分析就最恰當，皆因兩軍關鍵球員，都係嚟自「阿謙」有份喺Now TV評述嘅西甲賽事；加上佢連日來走遍莫斯科呢個足球狂熱城市「零距離」搵料，絕對有根有據！「阿謙」話：「俄羅斯係今屆參賽球隊中世界排名最低一隊，依家兩戰全勝入8球進身16強，梗係令人民驚喜！不過鬥烏拉圭先係佢哋真正考驗，近兩年我都有評述西甲，清楚烏拉圭嘅馬體會中堅高甸極為可靠，烏軍暫時兩場都成功冇失波，但亦只係『僅熟』贏1比0，反映佢哋攻力同樣不足。」
讚卓利舒夫係秘密武器
俄羅斯近仗都以迪斯尤巴掛帥，但「阿謙」批評呢位高大中鋒跑得慢，對住烏拉圭堅固防線猶如「打少個」，想入波唔易。不過「阿謙」亦有好料過畀俄羅斯：「我評述西甲時有留意效力維拉利爾嘅卓利舒夫，經常後備出陣交足貨，如果俄羅斯教練肯重用佢，或者會有驚喜。」
Now TV＋Now player同時睇兩場波
今晚同組另一仗「例行公事」埃及對沙特亞拉伯，「阿謙」私底下就撐埃及：「穆罕默德沙拿好辛苦先帶領球隊入決賽周，上場負傷上陣仍然搏到盡，希望有回報啦！」由於兩場煞科戰同時上演，「阿謙」表示兩場都想睇，但魚與熊掌難以兼得，勁羨幕身在香港嘅球迷，可以一邊開電視睇Now TV、一邊開手機或平板睇Now player直播，咁就唔會錯過任何一刻！
特派記者司徒子文莫斯科報道