挑戰達人陳念慈仲有夢追
前香港羽毛球名將陳念慈（Amy），12年前因觀看世界盃時一句「Why not？」而當上賽馬會見習騎師學校校長，憑着引入系統性訓練及利用「媽媽級」的傾心事技巧，為本港培訓出如蔣嘉琦般的星級騎師。成功不止於現在，這位3度做「開荒牛」的「挑戰達人」仍然有夢要追，誓要再為騎師界創造歷史。
一切從「Why not」開始
由羽毛球運動員轉型到香港體育學院任職商務統籌經理，再加入騎師學校當校長，Amy的職業路總令人意想不到，更「驚喜」的是，她加入騎師學校竟然與世界盃有關，當時情況Amy仍歷歷在目：「2006年喺比利時比完賽，知道德國搞世界盃，搵咗郭家明幫我買飛去漢堡睇，好記得嗰場係科特迪瓦對阿根廷，我仲撞到球王馬勒當拿（下圖）。應家柏（賽馬會行政總裁）亦有去睇，我同佢討論緊足球，佢突然問我一句：『你估你可唔可以訓練騎師成為世界級運動員？』，我回應一句『Why not？』雖然我相信騎師訓練唔簡單，但只要好似運動員訓練咁有系統，就肯定可以成功。」
Amy上任後引入多項改革，要求學員及職員考取專業資格，提高認受性：「騎師訓練由早到晚，要求體能等技術，同其他運動無分別。運動員唔可以一步登天，由基本功開始，每一小步都有成功點，例如做得好會送到外國交流，形成一個大家都清楚點樣邁向成功嘅系統。」
用媽媽級技巧傾心事
訪問當日Amy由辦公室駕車載記者到5分鐘路程的奧運馬房，介紹各項設施。行入馬房遇到不少學員，她都記得名字，逐一打招呼及詢問近況，這位校長平日甚至會留宿學校，用「媽媽級」的技巧與學員傾心事：「我會把握食飯後嘅休息時間傾偈，明白佢哋嘅心態同人生目標，佢哋好尊重我，亦當我係朋友。」
見到蔣嘉琦=見到自己
最令Amy難忘的學員，當然是由她一手「湊大」的蔣嘉琦，對這位小妹愛護有加，或是她從中看到自己的影子：「賽馬行業好男性化，好似我咁要從中爭取到認同係唔容易，佢由冇運動員底開始，初時幾下掌上壓都做唔到，到最尾做到130下，就係樂天又唔服輸嘅性格，加上刻苦同堅強先做到，成功必有價。」
從化新基地開荒繼續衝
轉眼又到世盃，今年是Amy在校第12個年頭，她以「好抵」形容，稱學懂騎術及馬匹的知識已「有賺」，更帶了不少前運動員入行，為注入體院訓練模式而滿足。這位「挑戰達人」心中仍有夢：「希望學生繼續成功，香港運動員做得更好，嚟緊賽馬會喺從化有新基地，希望從化好似沙田發展成功，亦希望喺從化培訓更多策騎員同馬房助理。」
Amy總結12年校長生涯，亦不忘呼籲有志在體育方面發展、嚮往與馬共馳的青少年投身他們的團隊。香港賽馬會由6月1日至7月31日招募新一屆賽事見習學員，為具備策騎天分的青少年提供投身賽馬事業的良機：「上網申請（www.hkjc.com/rdb ）就可以，學員有機會成為見習騎師，亦可出任其他工作崗位。」
圖／文：袁志浩