巴基之星冇厘正經

出道接近兩年，大家知「巴基之星」好有性格，受軟唔受硬，比賽時經常精神唔集中，出閘時更係魂遊太虛，若然打多兩鞭仲會索性罷賽添！上述特性，同當今球壇嘅意大利天才神鋒、有「巴神」之稱的巴洛迪利相類似。

周日遮打盃挑戰最長途

「巴神」因紀律問題淪為「被神遺棄嘅球員」，大家都唔想見到「巴基之星」步「巴神」後塵，希望佢學好學乖，因此上月底見佢正正經經咁跑，當勝出愛彼女皇盃之際，大家心情特別激動。現年5歲嘅「巴基之星」初次角逐草地2,400米，可謂向最高難度挑戰，亦為登上國際長途頂尖王者重要一戰。

巴洛迪利	巴基之星性格獨立，天分極高。

遮打盃為香港三冠大賽尾關，每年賽季最後一場一級賽，總獎金1,000萬港元，「巴基之星」今戰由貝湯美執韁，對手計有英國代表「化學能量」、本地精英「大雄圖」、「鷹雄」及「時時精綵」，實力強勁。「巴基之星」之前因為種種問題一度被迫停戰，令競賽生涯留下一段空白，「輸在起跑線」嘅佢今次賽事能否「贏在終點線」，打出漂亮翻身仗？周日留待大家一齊見證！

巴基之星事件簿

2016年3月 亮相香港國際馬匹拍賣會試跑突然不願展步，但仍被馬主丁志強以600萬元購入

2016年7月1日 首次出賽，起步慢閘一度落後廿個馬位，但直路狂追反勝，「輸在起跑線，贏在終點線」的表現引起熱話

2017年6月25日 出戰三級賽精英碟，卻在莫雷拉胯下突然拒絕競跑，過終點時遙遙墮後

2017年10月3日 復出試閘，在莫雷拉胯下再次罷跑，被勒令停賽

2018年2月25日 經連番試閘合格，於香港金盃復出跑獲第四名

2018年4月29日 易配布宜學出戰女皇盃勝出，首度揚威國際一級賽

2018年5月27日 出戰遮打盃