勇士尋日NBA季後賽西岸決賽Game4主場以92比95不敵火箭，場數被追成2比2。雖然史堤芬居里（圖右）全場取得28分，包括第3節爆Seed攻入17分，可惜勇士嘅季後賽主場16連勝聯盟紀錄依然被摧毀。嚟緊Game5勇士可能仲濕滯，事關有歌手會喺美國時間23同25日假火箭主場豐田球場開演唱會，而Game5正好夾喺2場騷中間舉行，令作客嘅勇士唔可以早一日踩場備戰，對近期手感飄忽嘅居里嚟講，絕對係一大打擊！
