東方龍獅夜戰滿貫 艾利諾登場琪哥興奮！
「戰神」艾利諾本地賽初登場，隊友李琪更揚言：睇佢表演！本地甲一籃球聯賽今晚輪到萬眾期待的「藍軍」登場，於晚上8時40分展開的尾場賽事，與另一勁旅滿貫再次合演大激鬥；艾利諾在香港已經儲落不少Fans，今晚再踏足修頓「處子騷」會為大家帶來甚麼驚喜，球迷絕對值得期待！頭場7時上演標準福建迎戰遊協，遊協同樣有居港洋將Eric Ferguson首次踏上本地聯賽大舞台，同晚有兩位居港洋將首騷，能否同時為球隊帶來今季聯賽首勝，大家不容錯過。
東方龍獅和滿貫季初已經在籃總盃、銀牌多次交手，藍、綠兩軍各有勝負，但今仗有別於之前對壘，皆因「藍軍」會由艾利諾領軍，加上李琪及一班本地薑，戰力大大提升，李琪更搞笑表示：「今晚係Marcus第一次打本地賽，梗係睇佢表演啦！」滿貫在季初的賽事已經展現贏波決心，歐陽維江、Bryant Austin、張偉康等球員都是實力派，李琪亦坦言不可輕敵：「滿貫有一定實力，維江係港隊骨幹，張偉康嘅三分波夠準，所以今場我哋會由防守做起，爭取逐場贏波。雖然我哋多咗Marcus，但要畀時間佢適應本地賽事。」面對對手實力增強，滿貫主教練呂楚威亦會有新部署：「我哋會以幾位球員輪流防守李琪同艾利諾，希望令佢哋出現不適應並且消耗兩人體力，並針對東方龍獅嘅外線，減低佢哋三分球威力。」
遊協Eric Ferguson勢騷哥利
尾場大戰精彩可期，頭場標準福建對遊協同樣睇頭十足，曾經征戰NCAA的美籍球員Eric Ferguson亦會首次踏上修頓大舞台，據好隊友Scott Ewing的描述，Eric內外線都具得分能力，能否為遊協在今季聯賽打響頭炮，球迷記得Mark實時間入場看比賽，為各支球隊打氣。
今日賽程
晚上7時 標準福建 Vs 遊協
晚上8時40分 東方龍獅 Vs 滿貫
地點：灣仔修頓室內場
票價：50元
長者及學生優惠票30元