打起新一代華人中堅余煒廉
年僅19歲的陽光元朗後衞余煒廉，今季獲「達Sir」提攜擔正，是少數能夠於港超站穩正選的華人中堅，其演出更大受好評，恩師「達Sir」亦讚其進步比想像中快。對此，余煒廉感激「達Sir」和一班好隊友的扶持：「今季踢得多咗，要多謝『達Sir』季中時畀機會我踢，可能因為上季有啲經驗，同埋跟咗球隊都一段時間。隊友都好照顧我，好多時都會教我點踢。」
團結衝銀牌感受最深
雖然獲得重用，余煒廉卻未有自滿：「希望將來繼續進步，因為落到場都仲有啲小毛病、小犯錯，希望之後做好啲，升上另一個層次。」球隊今季勇奪銀牌冠軍，余煒廉指團結就是一切：「今季體會最深嘅係，同球隊一齊努力去衝銀牌冠軍。大家都知我哋唔係班霸，但我哋好團結，證明到畀人睇團結比個人質素更加重要，呢樣係我今季喺銀牌體會最深嘅地方。」