騎士晉級叫胡！

勒邦占士絕殺屠「龍」！騎士尋日喺NBA季後賽東岸4強Game 3，主場再以105比103險勝速龍，場數領先至3比0，晉級在望。占士喺比賽中畀人又拉又打，但佢依然攻入38分，包括完場前8秒一下跳射得手，而且個人第227次出戰季後賽，亦超越咗馬刺「法國跑車」柏加，躋身史上第5位。
勒邦占士（黑衫）臨完場跳射絕殺，速龍球員成班得個睇字。（法新社圖片）
勒邦占士（黑衫）臨完場跳射絕殺，速龍球員成班得個睇字。（法新社圖片）

騎士今仗藉主場之利壓住速龍嚟打，比分一直領先，但第4節速龍發力追分，更憑安恩拿比臨完場嘅三分波追成103比103，呢個時候大帝「嚟料」，拎到波後跳射得手，帶領騎士成功絕殺。勒邦占士今仗獲38分、6個籃板同7次助攻，隊友路夫同樣出色，有21分及16個籃板。其實勒邦占士比賽中曾經喺防守時畀路維拉跌，剷籃又畀迪羅辛打中後腦，好在佢沉得住氣，贏波慶祝自己第227次出戰季後賽，躋身歷史第5位，排佢前面嘅得番費沙（259）、鄧肯（251）、荷利（244）同渣巴（237）。

76人（白衫）又輸畀塞爾特人，形勢危危乎。（法新社圖片）
  • 76人（白衫）又輸畀塞爾特人，形勢危危乎。（法新社圖片）

雙「人」大戰 綠軍險勝76人

同日另一場東岸4強Game 3，76人主場加時後以98比101輸畀塞爾特人，場數同樣落後0比3。雖然艾賓特有22分及19個籃板進帳，可惜佢喺加時6犯離場，成為76人輸波關鍵，「綠軍」謝臣塔圖及路斯拿分獲24分及18分。兩場東岸4強G4將喺香港時間周二朝早上演。

公鹿想搵女教頭

另據美國傳媒ESPN報道，正在物色新教練嘅公鹿，邀請WNBA前女籃全明星、現為馬刺助教嘅漢文（Becky Hammon）面試見工，令漢文有機會成為NBA史上首位女性主教練。