標準流浪護級失敗!

賽前僅得5分包尾的流浪，今仗要全取3分才有「生機」，甫開賽亦表現積極，當中鄭兆均與佐佐木周多次合作組織攻勢極具威脅，但始終未能先開紀錄，臨完半場流浪更先失守，伏兵門前的利安高接應基奧雲尼的橫傳輕鬆撞入，富力半場領先1球。

易邊後R&F富力即反客為主，先有伊達禁區外勁射遭黃子揚撲出，再有基奧雲尼門前大腳抽射，同樣被黃子揚救出。戰至68分鐘基奧雲尼禁區內回後，李銳腳面一彈破網，富力拋開至2比0。形勢險峻的標準流浪在74分鐘，有佐佐木周禁區內被對手拉跌，卡拉錫主射12碼中鵠，流浪追成1比2似見曙光，可惜球員體力不繼，補時階段再被基奧雲尼禁區內「埋齋」，結果R&F富力作客贏3比1，結束4連敗，落敗的標準流浪仍以8分落後尾2的夢想FC，在僅餘兩輪賽事下宣告護級失敗。

標準流浪楊賜麟（右）力阻R&F富力侯俊傑攻門。

標準流浪佐佐木周（右）同R&F富力羅拔圖各不相讓。

「賜B」望小將從此生性

流浪賽後眾將難掩失望之情，楊賜麟更坦言痛心：「今年球會變動多，要適應都有難度，但我哋盡咗力，希望球隊之後會有好發展，年輕一代珍惜往後嘅機會，太易得到就唔識珍惜，我自己以前都係咁，呢幾季先識生性，希望佢哋之後攞個心出嚟踢。」前途方面「賜B」無奈表示：「睇吓有冇球隊賞識，冇嘅話就喺甲組再打番上嚟。」

圖：袁志浩

文：余樂詩