香港足球明星選舉有得投票喇！
香港足球總會昨日舉行記者招待會，公布「2017/18香港足球明星選舉」詳情，今屆選舉以「Be the Crowning One」為主題，頒獎典禮將於5月17日舉行，屆時將公布各個獎項的得獎名單。與往年一樣，大會設立了「香港足球先生」、「香港足球明星十一人」、「最佳教練」、「最佳青年球員」、「最受球迷歡迎球星」，以及「球員之星」等17個獎項，投票期為4月20日至5月6日，各位球迷快啲投票啦！
獲提名的傑志後衞「唐文」唐建文，今季憑在亞冠盃及本地賽事的可人表現，成為球迷寵兒。對於「香港足球先生」，他早已屬意隊友華杜斯：「喺轉攻為守、轉守為攻方面都係全靠華杜斯，加上佢今季入咗10球，表現可以話係光芒四射，我睇唔到有得同佢爭嘅對手！」
「唐文」貼華杜斯攞足球先生
自華杜斯加盟，唐建文稱獲益匪淺：「我喺佢身上學到一種態度，落到場每一下都唔想輸，佢好想比賽，如果你叫佢打後備佢會唔開心，佢嘅鬥志感染到其他人。」今季傑志能夠成功衞冕聯賽冠軍、參與亞冠盃，「唐文」更入選香港隊。然而，在足球路上他仍未滿足：「足球員唔會有豐收，一日未完結都唔知自己去到邊，可能將來仲有更多呢？」至於自己能否獲獎，「唐文」早已拋諸腦後：「冇咁諗過，為球隊攞盃緊要過足球明星選舉攞獎。」
張志勇拉票：華人中堅唔輸蝕
同樣在今季憑出色表現獲提名的香港飛馬中堅張志勇說：「上年表現可能唔係咁好啦，所以冇提名我，今年好開心憑努力做番候選人。」以華人中堅身份成為候選人，「阿勇」認為是對華人中堅的肯定：「兩場代表隊，加埋球隊喺聯賽嘅表現，我覺得華人中堅真係唔會輸蝕畀其他人。季初自己知道唔係正選，好開心可以透過努力說服教練團，令我獲得正選位置，所以好滿意自己表現。」
曾屢受球迷批評的張志勇希望繼續獲得支持：「以往見到啲留言都係負評，今年終於見番畀到動力我嘅留言，我亦都好想同球迷講『希望我今年嘅表現冇令你哋失望，亦希望你哋可以繼續支持我，好希望你哋投我——香港飛馬張志勇一票！』。」
圖/文：陳焌鏗