姊妹情深目標衝亞運 單車美少女有大志！
香港單車隊一向戰績彪炳，由神級的黃金寶、女車神李慧詩，到世界盃冠軍張敬樂及梁峻榮等，在大型賽事都獲獎無數，令香港很多年輕人都想倣效幾位體壇Icon踩出彩虹。早前一班年輕車手在亞青賽表現突出，穿金戴銀，其中一對美少女李思穎及楊礎瑤是單車隊的未來希望之一；因為單車令她們的感情比「親姊妹」更深，二人携手追夢之餘，更渴望將來可以一起在世界舞台踏上加冕的台階。
17歲的礎瑤與16歲的思思（李思穎）自小因為玩三項鐵人而認識，繼而成為好朋友，礎瑤對單車極之鍾愛：「我好鍾意單車，但又覺得自己好慢，所以加多練習。後來被單車隊睇中，決定放棄三鐵，專心踩車。」反觀，思思玩三鐵時對單車極之討厭，但因為礎瑤這位好友，令思思對「兩個轆」由恨變愛：「我玩三鐵時好憎單車，不過同瑤瑤一齊練，之後仲入埋香港隊培訓，結果愈踩愈鍾意。」
專登轉校 互相扶持
思思無想過，昔日最討厭的單車，竟然令她首次參加亞青賽就可以踏上最高台階，她在今屆亞青賽為香港奪得1金1銅，成績是她意料之外。這對來自異父異母的「姊妹」，不時都以「家姐」及「阿妹」互相稱呼，「我哋乜都會講，最鍾意一齊去食嘢！單車、行街買嘢、感情事都係我哋嘅話題。」阿妹思思愈講愈興奮：「我哋仲專登轉埋同一間學校，咁樣讀書同練習都可以一齊。」
訪問當天正進行本地場地單車錦標賽，由於港隊精英在昆明備戰缺席下，這對好姊妹差不多包攬了女子組項目的頭二名，回想起亞青賽的時刻，礎瑤對思思奪得捕捉賽金牌的一刻仍然記憶猶新：「我嗌到好癲，佢衝贏一刻，我幾乎喊出嚟！」
想同李慧詩夾Team
能夠找到知心友，彼此有共同目標及喜好，的確幸福！這對美少女希望將來有一天可以並肩參與亞洲及世界大賽，齊齊踏上頒獎台更是二人的奮鬥目標。將要應付DSE的礎瑤更加雄心壯志要挑戰師姐，爭取今年亞運會的參賽席位：「我好想今年去亞運，希望可以同Sarah（李慧詩）夾Team參賽，我知呢個目標唔容易，因為要先贏李海恩及馬詠茹，但我會努力嘗試。」果然人少志氣高，香港單車的未來就靠你哋喇！