踏入4月將要面對硬仗連場嘅傑志，今午12時30分會喺自己地盤石門傑志中心，遇上前所未有嘅重大考驗！隊長盧均宜，將會聯同鄭展龍、辛祖同埋林恩許，決戰由50名傑志足球學院U8、U6球員組成的「超級無敵世界波」隊，賽事除咗歡迎球迷朋友到場為兩隊打氣外，亦都會破天荒安排喺傑志Kitchee同《我撐本地波》，兩個Facebook專頁同步直播，大家記得唔好錯過啦！
3月14日晚，傑志喺香港大球場憑後備入替嘅鄭展龍射入世界波，絕殺咗作客嘅日職勁旅柏雷素爾，成為第一支喺亞冠改制之後贏波嘅香港球隊，花名「泡泡龍」鄭展龍賽後唔止當選MVP「最有價值球員」，佢入嗰球世界波更攞埋第4輪分組賽嘅「最佳金球」，十分威水。不過，今日對住50個訓練有素嘅小師弟，唔知佢仲有無得威呢？鄭展龍說：「平時都會見到佢哋練波，年紀輕輕但都好投入同認真，好期待可以同佢哋交手。」
至於「藍鳥」隊長「均宜」就話，相信自己同幾個隊友都唔會喺「超級無敵世界波」隊前失威，但就有啲嘢好擔心：「『阿鵬』（即王振鵬）同咗香港隊去比賽，『 阿橋』（即郭劍橋）又唔得閒，我哋冇人守龍門呀！唔通搵『傑仔』幫手守咩！點算呀？」
傑志將會喺4月4日再上亞冠盃征途，而電影《超級無敵世界波》就會喺4月5日踢出燒鵝味道，今日一戰唔理誰勝誰負，相信雙方都會獲益良多。香港人撐香港波，超級無敵！信念如一！傑志加油！