上半季球隊表現畀到好多驚喜大家，我哋都覺得好鼓舞。但係踏入下半季，受到球員受傷，同外借返嚟嘅球員畀佢哋嘅球會收番，對球隊整體發揮構成非常大嘅影響。雖然係咁，我好高興見到每一位球員都好正面、好認真咁去面對，好似喺操練嗰陣，好仔細咁去做好每一個細節；加上加入咗「歐冲」（歐陽耀冲）、「巴西」（梁家希）同埋「楓仔」（廖培楓），調動方面加強番好多，希望今季剩低嘅比賽可以有好成績。
球隊今季目標係重用幾位年輕球員，佢哋亦都做到教練團嘅要求，我祝福佢哋將來可以成為港隊一分子。最後，再次多謝每一位球迷朋友，希望大家可以繼續支持我哋夢想FC。
專欄輪住嚟
夢想FC主教練 梁志榮