陳7開齋！香港飛馬派夠5蛋
昨日港超尾場夢想ＦＣ主場對香港飛馬，主隊有回流的歐陽耀冲正選上陣，可惜他上陣39分鐘便傷出。香港飛馬憑利馬梅開二度，加上麥保美、陳肇麒及查維斯各建一功，5比0大勝夢想ＦＣ，繼續力追榜首傑志。
飛馬30分鐘憑利馬的12碼先開紀錄，7分鐘後夢想歐陽耀冲撞射被梁興傑接實，未能追平之餘，「歐冲」更受傷退下火線。下半場仍屬飛馬世界，僅1分鐘利馬頭槌破網梅開二度，之後麥保美及隊長陳肇麒3分鐘內先後建功，同時獻上兩人今季「開齋波」，72分鐘查維斯門前「埋齋」湊成5比0大捷。香港飛馬贏波後領先第3位的和富大埔5分，惟仍落後榜首傑志8分。
勇戰傷出 梁志榮滿意「歐冲」表現
今仗「開齋」的陳肇麒表示：「依家入波對我嚟講唔係最重要，最緊要幫到球隊贏波，希望保到第2位，再喺盃賽爭冠。」對於入圍港隊初選名單，「陳7」表示有需要時便會為港隊效力。夢想ＦＣ主教練梁志榮指對球證判罰12碼感失望，但就滿意「歐冲」表現，希望他可趕及復出對傑志。