傑志亞冠第一擊力戰敗走天津

賽前，亞洲足協應傑志會方之申請，為上周六發生的大埔巴士奪命車禍進行默哀儀式。作客面對上季中超「3哥」天津權健，傑志不僅未有「泊大巴」，反而排出頗為進取的352陣式，務求與主隊爭奪中場。面對有比利時國腳韋素，以及前巴西國腳柏圖坐鎮的權健中場線，傑志安排了林嘉緯和黃洋，配合華杜斯、費蘭度及福保羅組成5人中場線。至於加盟「藍鳥」後迅速成為球迷寵兒的科蘭，則與港腳辛祖拍檔在前線攻堅。

儘管傑志要面對低溫、近乎「光頭」的草地又濕又硬等不利因素，賽前獲外界看高一線的主隊，首個具威脅的攻門，仍要到開賽後27分鐘才出現，曾在德甲搵食的法國籍前鋒莫迪斯迪，於禁區內接應糜昊倫的長傳，衝前一頂，眼見皮球柱邊入網之際，傑志門將王振鵬飛身撲出底線。

莫迪斯迪符碌入第2粒

戰至32分鐘，傑志終於失守，糜昊倫再一次長傳入禁區，莫迪斯迪在艾里奧力壓下銅頭一搖，龍門右下角入波，替權健領先1比0。更糟的是，4分鐘後莫迪斯迪於禁區內起腳「躂Cue」，皮球竟彈中回防的福保羅入網，幸運地將比數改寫成2比0。傑志球員驚魂未定，3分鐘後又再失守，王永珀長傳入禁區，孫可禁區內化身空中霸王頂成3比0完上半場。

換邊再戰，傑志試圖反撲，至65分鐘由唐建文入替福保羅，74分鐘由艾力士入替林嘉緯，希望改寫比數。80分鐘，落後的傑志依然未有放棄，憑列斯奧、費蘭度和艾力士一次小組推進，後者最後的傳中球，差點為主隊構成威脅。86分鐘，唐建文殺入禁區，接應辛祖二傳抽射高出，始於未能為傑志「破蛋」，最後以0比3敗陣。

南美射手科蘭（左）與柏圖惺惺相惜。	賽前為大埔巴士奪命車禍進行默哀儀式。	「藍鳥」球迷在天津奧林匹克體育中心落力打氣！

執靚後防下周鍊全北汽車

首場亞冠賽事以落敗告終，更一度在短時間內連失3球，傑志主教練朱志光賽後表示：「今場係第一場，仲要係作客，球員雖然好落力，但始終發揮上有瑕疵，開頭守得好好，只係對方有個好前鋒，掂波唔多但走位好，一個唔似機會嘅橫傳就入波，同時我哋亦犯咗唔應該犯嘅錯，失守之後球員唔夠冷靜，再畀人入多幾球，如果球隊接下來作客要有好成績，就要檢討後防組織，唔可以再失大意波。」比賽時天氣即使比之前暖，但朱Sir亦指場地好壞參半，卻被主隊選擇了上半場在較好一邊場進攻，結果令球隊受壓。一星期後，傑志將返回主場火併另一勁旅韓職的全北汽車，朱Sir表示，主場有較多球迷支持，加上有熟悉嘅場地，攻守發揮會更好。

袁志浩天津直擊