學踢足球，在部分家長眼中，或許只是「執靚」履歷表的其中一個方法。不過，對於身兼帝國集團環球控股有限公司副主席和太陽國際體育會副主席的楊素梅女士來說，則是一個幫助基層家庭的途徑。楊副主席較早前更獲頒2017年度亞洲傑出女領袖獎，為慈善不遺餘力的她更明言：「有能力幫人哋，自己都係一個幸運嘅人。見到小朋友開心，自己都開心。」
近年，坊間愈來愈多機構營辦足球學校，惟大部分學校均需家長支付高額學費，對於基層家庭來說，實在難以負擔。太陽國際體育會有見及此，於3年前開辦「足動太陽」課程，為清貧家庭的小孩提供專業足球訓練。太陽國際體育會熱心幫助貧苦家庭，源自當日一則新聞，深深打動了楊副主席：「最初睇電視，見到有小朋友喺垃圾站側邊做功課，我就係因為嗰個畫面開始。」
就是這一個片段，楊副主席希望自己能夠為他們的父母多走一步，引導他們健康成長：「好多小朋友都冇屋企人睇住，基層家庭好多都係爸爸媽媽要去做嘢，令到佢哋唔知做咩好。」
選擇足球為起點，楊副主席期望為兒童帶來正面影響：「足球有好多人一齊玩，可以令到佢哋溝通得好啲，知道合作嘅重要性。」訪問期間，楊副主席憶起一班小將能夠透過計劃建立自信、友誼都十分感動：「佢哋贏輸都一齊，贏波一齊開心，輸波成班一齊喊，個場面都好感人。」
楊副主席期望太陽國際體育會不但讓家長「托兒」，還渴望成為親子關係的「潤滑油」，把小朋友的另一面帶給家長：「喺活動入面，見到父母同小朋友一齊成長，父母平時可能會覺得小朋友反叛啲，但原來小朋友出到去同屋企完全唔同，可能親子間認識加深後，之後溝通會好啲。」
至於太陽國際體育會能夠為基層去到幾盡、付出多少金錢，楊副主席表示：「冇固定幾多錢，有需要就做，希望嚟緊可以去到深水埗區。」
現時「足動太陽」覆蓋葵青、離島、天水圍、油尖旺四區，受惠人數更多達四、五百人，由12位教練進行培訓。任職太陽國際體育會總監的陳志康（CowSir）期望透過與區議會的合作，讓「足動太陽」的小朋友能夠代表自己居住的社區出戰，回饋當區：「今年葵青都有兩三個，你幫到佢，佢叻嘅就幫番自己嗰區。」
不僅如此，「CowSir」還希望透過這計劃彌補社會不足：「政府、足總嘅培訓最細都要8、9歲，如果之前想學踢波又冇錢交學費，就可以參加我哋個計劃。」對於有潛質的門生，「CowSir」表示：「叻嗰啲我哋會推薦去球會青年軍，打啲高水平賽事。」