騎士洗牌大帝玩晒

先講騎士同湖人，騎士送走「小巨人」湯馬士同菲爾，仲有2018年首輪受保護的選秀權，換來湖人奇勒臣及拉利南斯兩位年輕球員，其中拉利南斯的父親曾在騎士效力，如今算是子承父業。另一單就係騎士與爵士及帝王「三角交易」，在交易中，爵士得到騎士送出古特拿及星級後衞戴歷羅斯，帝王則收到爵士射手祖莊遜及騎士森柏特，騎士就會得到爵士洛迪里賀迪及帝王的佐治希爾。帝王同時更得到2020年來自熱火的第2輪選秀權，另加300萬美元現金，至於「閃電俠」韋迪則被騎士送返母會熱火。有傳媒認為，騎士為留住「大帝」勒邦占士可謂不惜一切，將控球權較多嘅球星賣走，換來「綠葉」球員支援「大帝」，究竟騎士能否再次捧走總冠軍，真係要拭目以待。

勇士贏波賀湯臣牛一

至於NBA昨日常規賽事，勇士主場以121比103擊敗獨行俠，除史堤芬居里射入4個3分球，超越卡特獨佔聯盟射入最多3分歷史第7位，仲成功結束兩連敗，為踏入28日歲生日嘅奇利湯臣送上最佳禮物。同日，黃蜂雖然作客戢至到加時以103比109不敵拓荒者，但黃蜂主將甘巴則繼保羅佐治、杜蒙特同達基斯後，2018年明星賽勒邦隊第4個補選替工，原因係古辛斯、禾爾、路夫同普辛基斯均因傷退隊。