唔經唔覺已經做咗足球教練3年有多，自己好慶幸仲喺香港足球最高組別聯賽工作，喺度多謝一直支持同畀機會我嘅每一位，自己喺足球教練嘅工作仍然不斷學習中。好清楚要成為一個出色嘅教練，唔可以只講戰術講運用，仲有好多學問。
好似管理同溝通等等，喺球員時代，自己跟過唔同國籍嘅教練（巴西、西班牙、智利、塞爾維亞），都感覺到佢哋對球隊嘅風格同要求。當然仲有香港嘅教練同埋「堅爸」（即李志堅）啦！喺佢哋身上，我吸收到一啲我想學嘅學問。
喺足球教練理念上，我希望更多土生土長嘅香港球員，可以畀更多人認識同入選香港隊。目前和富大埔做得唔錯，大小港腳都有份入選，當然未來希望有更多，希望大家支持我哋。
和富大埔助教 李恒滙