落山踢和富大埔獲重生 翟廷峯唔係烏龍王

翟廷峯18歲於流浪出道，風頭一時無兩，踢了短短兩年便獲南華相中，但考慮到「上山」後的上陣機會竟放棄了。2013年始終還是「上了山」，一去便是5年時間。「初初覺得自己未有能力，覺得未係時候，所以拒絕咗。喺流浪一直有得踢正選，去到南華5年時間，季季都唔係點樣有得踢，好似浪費咗4、5年時間，始終一個球員唔Keep住踢，唔會有好表現。」

堅Sir信任做番自己

直至南華選擇自降，「廷峯」才得到「解脫」，28歲的他足球生涯得以重新開始，由銅鑼灣轉戰大埔，換來的是更多的上陣機會。「今季場場都有正選，好多謝堅Sir（教練李志堅）咁信任我，畀我踢新位置。嚟到大埔要踢3-5-2，變咗要上上落落，其實開頭都唔係好慣，因為我唔係啲上上落落嘅球員，依家踢踢吓先習慣啲。真係好多謝堅Sir，係佢叫我放膽踢，依家先真係叫做踢自己嘅足球！」轉會亦為他帶來一班好隊友：「大埔呢度真係好融洽，可能大家年紀差唔多，無咩麻煩嘢。」

場場正選	讚和富大埔十足一個大家庭。

差就要認學接受負評

今季在球隊表現不俗，為翟廷峯帶來為港隊披甲的機會，入選省港盃名單為港征戰，主客兩仗均正選登場，但作客失的兩球都與他有關，訪問間舊事重提，「廷峯」還是有點耿耿於懷。「盧琳出波太靚，大家都知佢出波好危險，我自己又貪心想唔畀佢出，點知追佢唔切，快腳就剷咗落去，一伸腳就12碼。」「廷峯」無奈續道：「第二球真係無得講，我係想返去包番龍門，個波左邊嚟，我已經盡晒力去救，點知個波省中我彈入，我都盡量救，但係無辦法囉，始終都係入咗波！」對於失波，「廷峯」自覺責任大，與隊友上台領獎時亦只有強顏歡笑。「我自己覺得作客真係踢得無咁好，始終我係屬於大嗰班，表現唔好我自己有啲內疚，就算贏波都覺得內疚！」

踢得好自然有人讚，表現差亦會有人批評，「廷峯」亦一一接受負評。「好似省港盃咁踢得差，網上面都有好多人評論我，咁自己真係踢得唔好，佢哋講咩我都會接受，唔會特別介意。」學習接受負評，「廷峯」亦希望今季於球隊有好表現：「希望踢波無病痛、多啲正選上陣機會，球員真係有得踢先保持到狀態，入選港隊都好睇球隊表現，所以我會盡力喺球會表現自己先，港隊教練賞識我就係後話。」

踢到踢唔到先退休

多年前曾於訪問時表示自己踢到30歲便會退休，現年二十有八的「廷峯」自言年少無知，以為30歲已經「好老」：「哈哈！細個唔識先話30歲退休，依家當然想踢得幾耐得幾耐，始終足球生涯短暫，唔踢得幾耐。」問到退役後有何打算，他表示會考慮轉行做生意，又或者考教練牌教波。

．本周賽程．

菁英盃分組賽

2月9日(五)

夢想FC Vs 和富大埔 A組

旺角大球場

晚上8時

$80、$30(特惠票)

2月10日(六)

標準流浪 Vs R&F富力 B組

將軍澳運動場

下午5時30分

$80、$30(特惠票)

2月11日(日)

陽光元朗 Vs 理文 A組

斧山道運動場

下午2時30分

$80、$30(特惠票)

香港飛馬 Vs 冠忠南區 B組

青衣運動場

下午5時30分

$80、$30(特惠票)

圖：何彥霆

文：胡恩晴