陽光元朗相隔50年再奪銀牌

陽光元朗本屆高級銀牌「神奇之旅」先後跟和富大埔及傑志激戰120分鐘後，分別以4比2及3比1淘汰兩支勁旅躋身決賽。為了於相隔半世紀後再奪這項殊榮，陽光元朗開賽初表現積極，不足1分鐘先有狄卡奧個人突破，但遭東方龍獅門將葉鴻輝沒收。東方龍獅之後慢慢站穩陣腳，攻門次數開始多。鞠盈智10分鐘中路抽射被法比奧頭槌解圍，隊友麥基立即衝前撞射，惜被昨天22歲生日的「壽星仔」陳嘉豪接實。

一直受壓的陽光元朗戰至17分鐘，終憑一個快反擊開紀錄，艾華頓右路接應葉頌朗傳送起腳，首腳射門雖被葉鴻輝擋出，但他把握機會立即於同一位置補射掛網，為陽光元朗先開紀錄，半場領先1比0。

易邊後東方龍獅換入沙巴加強攻擊力，卻被陽光元朗於59分鐘再下一城，祖連奴接應艾華頓窄位傳送禁區內一抽掛網，進一步擴大領先優勢。戰至82分鐘由劉浩霖把握葉頌朗射門被拍出不遠，門前「執雞」射入最後一球，為陽光元朗奠定3比0勝局，相隔半世紀再次捧起高級組銀牌冠軍！

元朗會長王威信（中）表明會好好獎勵一班功臣。	勞高（上）同狄卡奧（右）爭頂頭槌。	艾華頓（左）拎埋MVP獎同家人合照。

達Sir眼泛淚光直言夢幻

一眾陽光元朗球員表現興奮，頒獎後更走到球迷區答謝球迷支持兼拍照留念，個個Selfie都有求必應。球隊主帥曾昭達「達Sir」亦眼泛淚光：「真係好夢幻！贏傑志已經好夢幻，今日贏埋拎冠軍非常……我都唔知點講！成件事好天馬行空，我有諗過嘅，但係去到呢刻我都唔敢相信！」

會長王威信賽後亦難掩興奮之情，與主教練曾昭達擁抱，更表示會好好獎勵一班功臣：「當然好興奮！之前有機會捧足總盃但係錯失咗，今次終於能夠把握到呢個機會！呢個勝利係屬於全元朗，因為我哋元朗今日咁多人到大球場為球隊打氣。成個比賽係有60幾萬獎金，每個球員踢足3場都係會有3三萬蚊獎金，希望佢哋過一個開心農曆新年啦！」

兩位巴西外援杜馬思（右）同祖連奴大騷國旗。	曾昭達（中）直言今次捧盃「好夢幻」。	銀牌決賽場內鬥得激烈，觀眾席上同樣熱鬧。昨日陽光元朗大戰東方龍獅，元朗就組成近1500人的打氣團，組成一片「橙海」氣勢強勁。

足主郭靜然感謝「阿姐」捧場

50年前帶領球隊奪得同一殊榮的「阿姐」陳瑤琴，亦有到場支持。現任女足主郭靜然賽後多謝「阿姐」支持時，一度感動落淚：「佢50年前帶領我哋拎高級銀牌冠軍，到今日我成為元朗女足主，同樣捧起高級銀牌冠軍真係好感動！」

文：胡恩晴

攝：袁志浩