科蘭：會盡快操弗！
科蘭昨午現身石門傑志中心，參與加盟「藍鳥」後首課操練，由於球隊前一日已閉門進行一些戰術訓練，因此周六一課操練內容均以遊戲性質和射門練習為主。在現場有數十名球迷觀操下，科蘭在射門訓練期間亦伺機「露兩手」，多次起腳都能命中目標，操練期間主教練朱志光及助教盧比度，不時向科蘭講解戰術。
科蘭於操練後跟現場球迷拍照及簽名，隨後接受訪問時表示，對隊友印象不錯︰「我好期待同隊友操練，好高興喺操練認識一班隊友，佢哋好好人，球隊氣氛十分好。我雖然最近冇踢過比賽，但都有持續訓練，我會盡最大努力喺呢幾個星期內回復番頂尖狀態！」
對於球會的訓練設施，科蘭投予信任一票︰「喺呢度各樣設備齊全，對大家都好，能夠有一個恒常練波嘅地方係好事，而呢度個地點都好方便。」科蘭感謝前來觀操的球迷，並強調自己在場上會傾盡全力，協助球隊爭取佳績！