關兆昌李英健風格各異為後輩組隊
同為「Made In Hong Kong」的冠軍車手，兩代本地名將關兆昌（Charles）及李英健（Marchy）的賽車路卻有天壤之別，由入行形式以至學車方法各有不同，但論成就兩位均屬「車神」級。周五「杜拜24小時耐力賽」兩大車神夥拍3位香港車手歐陽若曦、方駿宇、唐偉楓出戰，原來是為下一代車手爭取更好成長環境！東網on.cc周五下午5時30分直播，見證5大高手「飛馳杜拜」！
故事由80年代開始說起，當時20出頭的關兆昌認識另一位本港著名車手呂米高，經介紹下由街道走入賽道，84年首次踏足澳門即一鳴驚人奪冠，其後於93年更成為澳門格蘭披治大賽車3冠王！回想當年，Charles仍回味無窮：「當年好特別，用3架唔同嘅車喺唔同賽事贏冠軍，每賽完1場就要跳去第二架車試車到比賽，諗番起都開心。」同一時期，9歲的李英健受父親影響，開始參與小型賽車比賽，並於法國接受賽車學校的正規訓練，成為香港首位3級方程式車手。
安全戰術融合5人特色
平行時空下，兩代香港車手用不同途徑踏入賽車界，學習賽車知識亦有差別，Charles指：「當時覺得自己技術唔夠，就會返去揸小型賽車，攞唔同車嘅感覺去令自己進步，邊似佢哋由細細個就由頭學起。」 Marchy補充道：「隨時代進步，每個年代都有自己嘅學習方式，新一代當然最正規，Charles嘅年代要靠自己領會，佢哋會有多啲經驗，揸咩車都得心應手。我嘅年代開始已經利用電腦數據分析，到依家試完Simulator（模擬器）就可以出賽，不過其實各有各樂趣。」周五舉行的「杜拜24小時耐力賽」，兩代車神將聯同歐陽若曦、方駿宇及唐偉楓出戰，5大車手各具風格，Marchy指團隊會作出取捨，採用最安全的戰術，相信屆時可融合眾人特色。
盼喚起公眾認同賽車
作為今次耐力賽的港隊召集人，Marchy透露背後原意，希望藉Charles重返賽場，喚起公眾對賽車的認同：「在香港參與賽車，往往畀人覺得唔似一個運動員，形象似花花公子，其實賽車都係一項運動，擁有佢嘅文化。今次5代車手無論輸贏，能夠組到呢隊香港隊已經好難得，希望帶出正面訊息，令下一代車手有更好嘅成長環境。」團結香港賽車界出戰別具意義，因此闊別車壇14年的Charles亦被這個頂尖組合吸引，決心「出山」一戰，為賽車運動發展出一分力。
賽事資料表
杜拜24小時耐力賽（24 Hours of Dubai）
日期及時間：1月12日下午6時至1月13日下午6時（香港時間）
地點：杜拜賽車場（每圈長達5.39公里、共16彎）
香港車手：關兆昌、李英健、歐陽若曦、方駿宇、唐偉楓
代表車隊：亞洲鳳凰車隊（Phoenix Racing Asia）
出賽戰車：奧迪Audi R8 LMS GT4賽車
圖／文：袁志浩（部分相片由車隊提供）