2017港超震撼時刻

東網連續3年直播港超聯

一不離二，二不離三，足總喺今年8月24日嘅季前記招上正式宣布，東網on.cc連續第3個球季奪得港超聯嘅獨家網上直播權，仲會同多個網上媒體合作，進一步加大推廣呢個「香港人嘅聯賽」嘅力度！

乜都贏番晒傑志擸3冠

失落咗一季港超冠軍嘅傑志，喺2017年可以話乜都贏番晒返嚟，加入咗金東進同華杜斯兩名國腳級猛將，令如虎添翼嘅「藍鳥」重登港超聯盟主寶座之餘，亦捧走高級組銀牌同足總盃錦標，成為「3冠王」。

雖然喺年初挑戰亞冠盃外圍賽第三圈失敗，但喺新一屆嘅亞冠盃，傑志將會以港超冠軍身份，喺E組同全北汽車等亞洲勁旅，決一高下。

費蘭度膺4料足球先生

傑志成為「3冠王」之外，仲做埋「2016-2017年香港足球明星選舉頒獎典禮」嘅大贏家，一啲都唔令人意外。中場「好波之人」費蘭度（右圖）憑住出色嘅表現，唔止成為「最佳中場」、「最受球迷歡迎球星」同「球員之星」，更力壓兩名隊友金奉珍同辛祖，攞埋「足球先生」，佢之後用「人生最美好一天」嚟形容做咗「4料足球先生」嘅心情。另外，傑志主帥「朱Sir」朱志光亦都大熱當選「最佳教練」。

南華自降甲組震驚球圈

好多球圈老前輩都話：「南華好，球市好！」由2014年球季開始，不斷換球員、換外援、換教練同換管理層嘅南華，錢就使咗好多喇，可惜始終同主要錦標無緣，最終會方喺今個球季開始前，做咗一個令擁南躉傷心、反南躉擔心嘅決定──「退出港超聯，並轉戰甲組聯賽以培育青年球員」。

南華會方決定「自降」後，原足主、南華會方同多名華洋球員爆出一連串合約糾紛，好彩喺「有力人士」出面協調下，事件最後都得到解決，大部分球員都有班落，其中最受球迷愛戴嘅「Mr.Right」高美斯，輾轉短暫效力過埃及同黎巴嫩球會後，於年尾獲香港飛馬收歸旗下，並與掛靴後轉職為助教嘅朱兆基再續前緣。

放大圖片	放大圖片	放大圖片

鐵血陳偉豪告別港隊

一度揚言隨南華「自降甲組」嘅陳偉豪，喺解決晒所有合約糾紛後，決定加盟新軍夢想FC，令職業球員生涯可以延續。不過，「偉豪」嘅代表隊生涯，就喺今年6月7日香港隊主場對約旦嘅國際熱身賽後完結，賽事下半場72分鐘入替嘅佢，代表咗香港隊17年，總共上陣過65場國際A級賽。

亨利鄭少偉感人掛靴

有「港足浪人」之稱嘅「亨利」鄭少偉，喺上季之後宣告掛靴，結束15年嘅職業球員生涯。2017年5月27日季後附加賽決賽，正係「亨利」告別戰，佢後備入替博得12碼，親自操刀協助東方龍獅以6比1大破佢嘅前度球會南華，賽後一眾隊友身穿印上「亨利」頭像嘅Tee送別佢，場面感人。

放大圖片

放大圖片

和富大埔捧菁英盃威威

2016至2017球季中除傑志外，唯一能夠捧盃嘅就係和富大埔喇！佢哋捧盃之路一啲都唔易行，先喺第一圈以1比0淘汰傑志，8強4比1淘汰南華，入到4強再以3比0踢走冠忠南區，入到決賽雖然先畀對手香港飛馬領先，但最終反勝2比1捧盃。季內表現出色嘅中場伊達同前鋒盧卡斯，季後都離隊他投。

港足終於有私家場喇

足總行政總裁薛基輔，喺今年12月19日嘅新聞發布會上為大家帶嚟好消息，位於將軍澳嘅足球訓練中心，好大機會喺明年嘅4月正式啟用。中心擁有3個真草11人場、3個仿真草場同1個五人足球場，其中一個同香港大球場「同級」嘅大場會係香港隊專用，其餘場地會開放畀公眾，但係港超球會就有優先使用權。CEO仲話已經邀請咗日本同南韓等亞洲國家嘅足總，安排球隊嚟香港集訓同租用中心設施，藉以增加中心嘅收入。

東方龍獅1分完成亞冠

貴為首支躋身亞冠盃分組賽嘅港超球隊，東方龍獅（右）面對同組對手中超嘅廣州恒大、韓職嘅水原藍翼，同埋日職嘅川崎前鋒，最終以6戰1和5負得1分完成賽事，其實都唔算太意外。只係由於缺乏「雙線作戰」經驗，加上傷兵問題，令東方龍獅連本地賽亦失利，最終衞冕港超失敗。季後會方宣布，原任副總監司徒文俊會接「牛丸」棒，成為球隊主教練，而球會Icon李健和亦會重出江湖，輔助「司徒Sir」，「牛丸」就續留隊專責數據分析工作。

謝德謙創不失球紀錄

冠忠南區重返頂級聯賽後，雖然仍然未贏到錦標，但就贏盡口碑，其中正選靚仔門將謝德謙，喺今年4月4日球隊對理文流浪嘅港超聯賽事，創下884分鐘不失球紀錄，打破港甲名宿、已故東方門將「肥福」希福特所保持嘅863分鐘舊紀錄，十分厲害！

放大圖片	放大圖片	放大圖片

中村「王子」分獲金球撲救

「2016-2017年香港足球明星選舉頒獎典禮」當晚，亦係「車路士足球學校（香港）X 東網」「最佳金球」同「最佳撲救」公投揭盅嘅重要時刻。效力和富大埔嘅鋒將中村祐人（左），喺球隊作客九巴元朗射入嘅一記超遠程罰球，力壓香港飛馬黎洛賢同傑志費蘭度，奪得「最佳金球」；而「最佳撲救」就由冠忠南區2號門將「王子」王子謙（右）奪得。

富力主場回歸廣州一波三折

上季空降港超聯嘅R&F富力，今季進一步加大投資，唔止羅致咗伊達、羅拔圖同基奧雲尼幾個有豐富港超經驗嘅猛將，同獲廣州富力借用身價達400萬歐元嘅前丹麥超射手般連奴，仲獲足總董事局「開綠燈」，畀佢哋將主場賽事安排番喺廣州燕子崗踢，之後雖然因為個場嘅設施「肥佬」，一度不獲足總安排賽事，但最後都搞番掂。可惜隊波雷聲就大喇，開季以嚟成績麻麻，貨不對辦嘅般連奴亦已「炒魷」，唔知主帥馬里科喺轉會窗後，搵唔搵到啱使嘅新兵呢？