夏登送暖變身黑鬚聖誕老人
占士夏登今季在火箭打到識飛，甚至成為NBA常規賽MVP大熱門，同時「大鬍子」喺球場外亦好得粉絲歡心，例如佢趁聖誕大戰前冇比賽，就帶埋媽咪去做社區愛心活動，而且買咗好多聖誕禮物送畀休斯敦嘅小朋友，「黑鬚聖誕老人」好波又有善心，得到網民瘋狂畀Like！
周琦開P單車送小朋友
其實自2012年開始，夏登同媽咪就堅持進行呢個聖誕愛心活動，而且佢話，能夠同小朋友一齊買玩具係好開心嘅事：「我細個時候，會好期待收到禮物，但依家我發覺，其實送禮物畀人有更深意義。」至於中國球員周琦，就出席火箭嘅主場派對，同200名小朋友見面，仲送出單車做聖誕禮物添！火箭將於香港時間今晨作客勁旅雷霆，職球員均信心十足要擊敗對方。