劉卓軒減磅再衝過

「點解會肥？其實我又唔係食好多嘢，但喺南華冇乜上陣機會，個人頹晒唔肯郁，先搞到咁。」2015年上山加盟南華，可惜苦無機會，兩季只上陣7場：「有次我連後備都冇，要坐觀眾席，有人同我講：『肥軒，你仲肥過我呀，點踢波呀？』」這只是其中「出得街」的說話，但更多的冷言冷語，劉卓軒都照單全收，「其實好唔開心，但呢個又真係自己問題。」「全盛時期」的肥軒重達78公斤，佢形容真係跑兩步都冇氣！

直到今年加盟標準流浪，肥軒才猛然醒覺：「見到一班年輕球員，我覺得自己唔可以再係咁落去，我好想做番個好榜樣。」自此這位流浪中場不時早到加操練跑，球會健身室亦成為其「減肥基地」，勢要變番以前的「細軒」。「其實我真係冇猛咁食嘢，阿國（卓耀國）、BB（黎洛賢）食多我一倍都唔肥，我就食少少都肥……」飲水都肥的無奈，相信不是人人明白。談到流浪會長莫耀強設10萬元獎勵球員及助教減肥，劉卓軒表示：「其實有冇獎金我都會減喇，呢個決定係為咗自己。」

要減肥，帶氧運動不可少！

「肥軒」（右）投入練習，為足球前路全力打拚。

新任隊長誓幫流浪反彈

曾一度被評為港隊明日之星的劉卓軒，眼看同期的隊友都走得更遠，都希望爭一口氣：「見到以前嘅隊友踢大港腳，我都好開心，土生土長嘅香港人踢港隊，先會有更多球迷入場支持。可能球迷已經遺忘咗我，但我會證明畀佢哋睇，我都可以。」球會總監李輝立直言不會放棄劉卓軒：「佢有技術同潛質，曾經諗過佢可以做蔣世豪接班人，不過能否上番高峰就要靠佢自己努力喇！」

減肥關鍵從來不是在於計劃有幾周詳，而是在於決心有幾大，「以前會食宵夜，依家唔食喇，最多食個蘋果。唔可以白白浪費努力成果……」劉卓軒暫時減掉4公斤，雖然離目標仍有一段距離，但已有明顯分別：「依家跑得爽咗，狀態好咗，自信心都大啲。」對香港飛馬一戰，劉卓軒帶上隊長臂章，這位新任隊長表示：「今季希望大家一齊進步，以流浪實力唔應該係榜尾球隊。下半季目標一定係搶分，希望可以護級成功。」

圖/文：余樂詩