贏波要靠激情拚勁 拳霸李毅凱享受操爆廠

作為防守球員，在場上與外援及入籍兵硬撼，本地球員體能及對抗性上難免輸蝕。李毅凱自上季中開始學打拳，由最初只想「練大隻」，到現時已被打拳所吸引：「打拳出晒汗又用到力，嗰種拚勁係我最鍾意，我好享受用盡全力嘅感覺。」不過即使「阿凱」有運動底，一開始亦被操到「爆廠」：「打拳嘅身體對抗性要求多過踢波，平衡同協調都好重要，例如每拳都保持速度同力量，好講求耐力，初初唔識去協調，剩係熱身都爆咗廠。最辛苦係做核心肌群嘅訓練，要我谷實腹部，被拍檔一拳打落嚟。初初都會驚同縮，但原來放鬆啲就冇咁驚，畀佢打落嚟先練到腹部嘅平衡，唔會令自己咁易被打低。」

欣賞「沙拉」有事第一個出頭

同樣道理，勇於面對困難或批評才是最佳處理方法。「阿凱」以往常發脾氣、做出不智行為，經歷多次被教練及外界批評，他反省後覺得「好蠢」，現時會不斷警惕自己，在控制情緒上已見進步。不過仍有球迷戲稱「阿凱」為「拳霸」，更有網民笑他不如轉行打拳，「阿凱」卻認為火爆源自激情，激情只因爭勝心，以及他引以為傲的義氣：「每個人落到場都想贏，認真起嚟就自然有火，火爆其實就係激情。我覺得自己係好有義氣嘅人，好球員Gentleman得嚟都要有霸氣，咁先有人服你，或者令對手驚你。我比較鍾意『沙拉』沙治奧拉莫斯，佢火爆但好識照顧隊友，無論有咩事發生，佢都第一個行出嚟，我就係想做呢種球員！」

「阿凱」喜獲向柏榮師傅（右）提點。	李毅凱坦言近年已學會控制情緒。	今季效力香港飛馬嘅「阿凱」（左）表現得到認同。

省港盃踢到眼濕濕一世難忘

今年初的省港盃次回合，港隊雖然於主場戰和廣東，總比數落敗無緣捧盃，不過李毅凱就在下半場戴起隊長臂章，領導防線並跑足全場，展現無比鬥志，這仗更成為他心目中至今最激情的回憶：「嗰隊港隊差唔多全部都係土生土長嘅香港年輕球員，好有代表性，加上做隊長責任感更大，攞唔到冠軍係失落，但我哋打出拚勁同模式，隊友互相鼓勵，仲有好多球迷拍掌大叫『香港隊』，嗰刻好感動，覺得好光榮，呢一世都唔會忘記，係我第一次踢波踢到眼濕濕，我想話畀大家聽，我哋會繼續努力，下屆攞番個冠軍！」

圖／文：袁志浩

場地提供：Bomber Gym

部分圖片由受訪者提供