「潮韋」保羅佐治冇料到 雷霆挖金失手4連敗
NBA昨日常規賽事，雷霆作客以94比102不敵金塊，慘遭4連敗！今仗雖然「甜瓜」安東尼挺身而出攻入28分，點知又輪到「潮韋」韋斯布克同保羅佐治「零手感」，搞到雷霆於開季以來，面對西岸對手6戰全敗，唔好話爭總冠軍有難度，就連入唔入到季後賽都未知呀！
其實雷霆一直在比分上咬住對手，可惜韋斯布克關鍵時刻接連射失三分球，最後佢僅得13分、7個籃板同5次助攻，加上缺態嘅保羅佐治只得13分、8個籃板同2次助攻，就算安東尼有28分同5個籃板，都改變唔到雷霆今季對西岸球隊6戰全敗嘅厄運。
占士1073場常規賽威過波神
唔只咁，美國傳媒仲發現雷霆今季6次於完場前5分鐘，分數差距最多得5分嘅比賽完全未贏過，反映佢哋喺分數拉鋸情況下，冇辦法完成贏波任務，認真令人擔心。另一方面，米沙比有17分、7個籃板同5次助攻，成為金塊取得2連勝嘅贏波功臣。
雷霆今晨將硬碰快艇，雖然快艇喺西岸只排第9位，但實力仍較位列12嘅雷霆強，取勝機會快艇被看高，雷霆要破解連敗魔咒，睇怕要去到本月13日對小牛之戰。
同日，騎士作客以113比117不敵火箭，勒邦占士個人第1,073次常規賽上陣，超越「波神」米高佐敦進佔聯盟歷史第82位，可惜佢第1節已經受傷，在還剩4分6秒時嘅一次突破中，左腳足踝恐怖扭成90度痛苦倒地，即使隨後佢頂硬上，全場取得33分、4個籃板同7次助攻都冇用。占士夏登取得35分、11個籃板同13次助攻嘅「3雙」數據，包括第3節連入3個三分，帶領火箭升空完成4連勝。