新進大港腳唱出夢想 謝家榮係門神仲係歌神
香港代表隊明晚於主場迎戰巴林，大軍名單上出現了一個新名字，就是年僅18歲、效力夢想FC的「港版當拿隆馬」謝家榮！這位早年已嶄露頭角的門將，讀書時最叻只是幫母校取得學界足球賽第4，反而參加歌唱比賽卻能奪冠圓夢！既然謝家榮唱歌掂，今次專訪當然要一展歌喉，想知他唱成點？記得去24小時港超聯電視ilovehkpl.on.cc看他個人Solo喇！
訪問地點相約在謝家榮母校孔教學院大成何郭佩珍中學，「家榮」表示這裏帶給他無限回憶：「我好細個已經入選香港青年軍，之後得到好多到外地比賽嘅機會，所以曾經認為踢學界賽好兒戲，無乜點理佢！但去到中五時，我覺得喺學校嘅日子無多，想幫學校做番啲嘢，而我只係踢波叻，就落足心機去踢好個校隊。可惜最後只係拎到第4名，我當場都有喊出嚟……老實講，我好多比賽都踢過，但代表學校會特別上心，呢個亦係學界賽嘅魔力，亦可以話係好寶貴嘅青春回憶！」
想學陳7文彼得出碟
雖然在足球範疇未能圓冠軍夢，但謝家榮卻有另一專長助他圓夢：「我好鍾意唱歌，因為可以舒解壓力，無論係跑步、沖涼、甚至練緊波……我都會唱歌。久而久之練到唔錯嘅歌喉，所以中五就參加咗校內歌唱比賽『何中好聲音』，當時唱咗3首歌，分別係《半祝福》、《分手總約在雨天》同埋《問好》，好好彩拎到冠軍！」早幾年本港球壇有「陳7」陳肇麒與文彼得等組成《Red Force》唱歌出碟，問到謝家榮若有機會，會否倣效前輩，他直言只要不影響足球事業，甚麼也會嘗試。
賽前唱《黃金入球》激勵自己
很多人都會有首主題曲，謝家榮也不例外：「每次球賽出場前，都會唱周國賢的《黃金入球》或Supper Moment的《無盡》！我相信每個球員都會好鍾意《黃金入球》呢首歌，因為歌詞好到Point，就好似嗰幾句『不怕跌傷，要用雙腿創造我理想』、『將我領土90分鐘裏盡量擴張』……每次唱都能夠令自己情緒激昂！至於《無盡》嘅旋律好好聽，歌詞方面相信我之後有咗更多人生閱歷，就會拿捏得更好！」難得今次專訪有機會，當然要他一展歌喉，效力「夢想FC」的他，就選擇了「夢想，於漆黑裏仍然鏗鏘」的《無盡》來Solo啦！
謝家榮讀到中五時，便因獲得英甲球隊貝利開出學徒合約，決定休學到英國發展。當時老師們沒有阻止之餘，更支持他實現「夢想」的決定！到今個球季，謝家榮在「夢想FC」實現了「夢想」，穩坐正選位置之餘，更入選港隊。日前港隊主教練金判坤表示，明晚對巴林一戰會在60分鐘後給予年輕球員上陣，且看這位18歲小伙子能否實現「大港腳」第一頂「喼帽」的夢想吧！
謝家榮知多啲
年齡：18歲
身高：1米86
位置：守門員
曾效力港超球隊：理文流浪
現效力港超球隊：夢想FC
圖/文：司徒子文