香港「四眼Cue后」吳安儀又再封后！她昨於英國舉行的WLBS伊甸女子桌球大師賽決賽，苦戰下以4比3險勝世界排名第1的東道主球手伊雲絲，登上后座。
安儀於賽事展開前幾日，曾在香港出水痘，最後趕及康復兼成功贏得冠軍，一年內先後贏得世錦賽、全英賽及大師賽三大錦標，認真值得畀Like。
吳安儀賽後在其Facebook留言：「今次決勝局，係同伊雲絲於新加坡世錦賽對碰時的翻版，在決勝局落後67度，而當時枱面得番6隻紅波，最終在劣勢下反勝，未打到最後真係唔好放棄。」
安儀又稱，賽後伊雲絲懷疑計錯分，要求翻查分紙，幸最後維持原有賽果。吳安儀今日返港，2個星期後去卡塔爾參加世界業餘錦標賽，大家幫佢加油啦！