今季累積6冠吳安儀：未夠喉

想3年內做世界「一姐」

昨日返港的安儀獲男友接機，對於奪得個人季內第6個冠軍，她希望有機會再衝冠：「今季仲未完，我想繼續攞！冠軍以外，我感覺自己經驗多咗，但有時都唔肯定打邊隻波至好，所以賽後會即刻同教練討論。」安儀亦在出桿動作上作微調，令出桿時間性更準確，希望有日可以成為世界「一姐」：「我希望2、3年內可以做到，但好多時唔係想就得，所以我會將呢個目標擺埋一邊，先簡單地打好每球波，等自己慢慢進步，向目標進發。」

至於安儀的好拍檔溫家琪就於全英賽贏得季軍，兩人由隊友到房友，情同姊妹，在機場拍照前更互相幫對方整理獎牌及衣服，溫家琪指只要有安儀在身邊就開心：「佢帶嚟好多正能量，畀到好多意見我，大家又會分享比賽過程，同佢一齊進步係開心事。」兩人今個月尾會再次出發到英國參加排名賽，力爭再創佳績。