東網直播大球場全勝軍對決 香港飛馬 傑志爭1哥位

（東網on.cc周日下午5時30分直播）

楊正光望做好反擊搶分

今季在聯賽有好開始的香港飛馬，繼首戰作客以1比0小勝冠忠南區後，上周則在落後1球的情況下，憑着後備上陣的梁嘉恆梅開二度，以3比2反勝R&F富力。然而主教練楊正光表示球隊仍不乏進步空間：「單睇成績，贏波係滿意嘅，但係仍然有啲地方要改善。上仗喺下半場都有啲體能上嘅問題，畀到對手好多機會，所以球隊要喺體能上同防守上嘅紀律有所加強。始終今仗面對嘅係傑志，防守工作會比較多，因此反擊嘅效率要提高，先有機會搶分。希望球員喺兩連勝後打起信心，可以於主場贏波，但係唔能夠掉以輕心，始終我哋要再加強先可以喺前列上爭取最好排名。」

飛馬上仗因傷退下火線的伊高，經過數日治療後已無大礙，至於上仗「起孖」的梁嘉恆在跟球會商量過後，決定踢罷今仗大戰才接受腹股溝手術，預計要休息3周。

朱志光諗計增加進攻點

今季力爭衞冕的「藍鳥」傑志，先於揭幕戰憑着華杜斯一箭定江山，以1比0小勝宿敵東方龍獅，上周更大開殺戒，以7比0重創夢想FC，今季表現搶眼的新援盧卡斯更上演「大四喜」，不過主教練朱志光仍有顧慮，亦擔心盧卡斯的負擔過重，並強調球季漫長，贏波之餘更要在球員整體上的狀態找到平衡：「我唔希望傑志攻勢同入球集中晒喺盧卡斯身上，始終成個球季會有唔同球員有傷病，所以都要喺踢法上搵一個好啲處理方法，確保有足夠嘅前線球員，同時保持到良好狀態都非常重要。」

傷兵方面，「藍鳥」目前僅得保連奴仍處於恢復期，「朱Sir」表示希望給予他一定的上陣時間，讓他重拾狀態。