舞蹈+雜技+跳繩 俄雙妹嘜搶晒Fo
跳繩加舞蹈有得諗！年僅15歲的俄羅斯雙妹嘜昨日超搶眼，靚女Nika與拍檔Kate於二人同步花式賽將舞蹈及雜技元素完美融入於表演中，兩人開場姿勢相當厲害，Nika企在Kate的膊頭上玩繩，之後她們更做出「無敵風火輪」及拱橋，最終於該項目贏得金牌，兩人獲獎後激動得相擁落淚，Nika亦在個人花式賽及四人同步花式賽獲得2銅。
Nika與Kate自5年前接觸跳繩開始認識，成為戰友令她們友誼加深，默契爆燈：「雙人花式好重視『同步』，我哋動作幾乎要一模一樣，好在我哋都好愛對方，有時仲會一齊討論花式添！」原來兩人都是跳舞出身，只是基於好奇才玩跳繩：「其實我哋隊全名係跳繩及跳舞隊，所以會加入舞蹈元素，依家訓練都係練花式多。要我揀跳繩定跳舞，真係好難揀，兩樣都係我生命嘅一部分！」Nika的母親更擔任教練，為囡囡打點一切，一同出外參賽，認真開心。
