Rex霸氣回應：口講冇用

倘落敗有「重賽」優先權

Rex與「Tough Boy」河野公平的對戰講足兩年終於成事，Rex今仗爭取22連勝之餘更要衞冕WBO超蠅量級國際拳王金腰帶，其經理人劉志遠（Jay）稱售票情況理想，更指河野的拳酬是歷來最高，合約中亦設有「重賽」條款，假如Rex今次落敗，將有優先權於6個月內再迎戰河野。現年36歲的河野現時雖未有任何金腰帶在身，但就信心十足：「我一定會贏，相信只需9個回合就可KO Rex！」Rex亦不甘示弱：「可唔可以KO對方，口講係冇用，係講臨場發揮同機會，我會將最好嘅嘢發揮出嚟，到時大家就知結果！」

曹星如衝22連勝練到想嘔

Rex自今年3月擊敗向井寬史取得21連勝後，於6月尾重投訓練，不過傷患仍未完全康復，所以今次留港備戰，以便物理治療團隊隨時應付受傷情況。Rex坦言為今仗「練到想嘔」：「過去一星期都有想嘔感覺，訓練係同兩位拳手打車輪戰8個回合，其中1位係前WBC輕量級青年世界拳王渡邊卓也，佢所屬重量級別比我高，同佢訓練令我多咗概念去攻擊及擾亂對手。」

當日另外兩場爭金腰帶賽事，日本美女拳手後藤亞由美會與印度拳手Kirti合演WBO女子超雛量級亞太區拳后寶座爭奪戰。被問到會支持曹星如還是河野，亞由美指：「我同河野係同一拳館嘅拳手，但自己亦好感激港人嘅照顧，所以希望佢哋打和！」另1場金腰帶賽事，就由渡邊卓也與中國拳手黎樂善爭奪WBO洲際超羽量級冠軍腰帶。