前體院仔夾檔 陳偉豪空降 夢想FC重建銀禧

CEO梁智駒（右）為陳偉豪戴上「喼頓」臂章。

屯門翻新宿舍起基地

夢想FC今夏簽入柏保路、加倫、拿祖、祖亞昆及雷斯5名西班牙兵，以及上季效力標準灝天的南韓亞援尹東憲，另外亦有陳偉豪、黃耀富及梁國威等具經驗華將在陣，為球迷熟悉的管理層及教練團包括梁志榮、招重文、李思明及歐偉倫等港甲名將，實行「以老帶新」。球會行政總裁梁智駒在記者會上透露，會方目前已計劃在屯門翻新一間空置的宿舍，並建立一個人造草球場作為球隊基地，暫定明年將會動工，而原本打算申請以屯門鄧肇堅運動場作主場，卻因為手續需時而改用青衣運動場。

前季執教夢想駿其獲不俗評價的主教練梁志榮則表示：「希望有人知道佢哋（隊中年輕球員）存在，任何年齡層都持續入選香港隊。當然，以球會立場都要爭取好成績，但球員發展對我嚟講係首要，希望阿Kim（金判坤）會選一兩個球員入港隊，等佢哋吸取經驗。」球隊將於8月7日出發前往泰國集訓，屆時會與泰國不同級別的球隊拍跳6至7場。

夢想FC的5名西班牙外援，當中柏保路（中）曾在港效力夢想駿其。	開操大吉	密密操

「豪哥」做隊長帶住小將

獲委任為隊長的陳偉豪，坦言跟新東家傾談合作時一拍即合：「其實同夢想傾嘅時間唔多，因為大家本身都好熟，理念亦相近，加上教練團全部都係『體院仔』，嚟緊目標係有自己球場，建立自己團隊。」對於今次「落山」轉投一支「青春班」球隊，「豪哥」認為是一個合適的決定：「踢呢兩隊波性質唔同，踢南華競爭大，反而呢度適合自己年紀。希望幫到年輕球員，令佢哋成長得更快，日後可以喺港隊見到更多本地球員。」