普多斯基冧盡隊友粉絲

普多斯基嚟緊日職首騷，自然希望當敵衞「雪糕筒」咁扭。

日職直擊第二日，記者嚟到位於神戶市西區嘅勝利船訓練區，睇吓佢哋訓練。喺近30度嘅悶熱天氣之下，普多斯基依然落力操練，冇話因自己係國際球星而Hea。勝利船一眾球員先進行拉筋，去到類似馬騮搶球式嘅小範圍逼搶演練，「王子」都非常投入，當隊友傳失波嗰陣，雖忍唔住大嘆一聲，但仍會上前善意指導隊友。之後到「戲肉」分隊比賽，普多斯基明顯有啲保留，似乎係為嚟緊周六佢嘅日職首騷對大宮松鼠留有一手，反而另一新加盟嘅前鋒夏雲拿表現Sharp醒，不過都可以理解，始終普多斯基主力地位穩陣，相反夏雲拿唔落力啲隨時冇碇企。

過百粉絲撐場 有求必應

綽號「王子」嘅普多斯基表現親民，訓練過程中「公關上身」，不斷同隊長渡邊千真丶隊友及助教交流，睇嚟極速融入球隊。巨星操練吸引到有過百球迷喺場邊觀操，勝利船眾將完操後，亦同粉絲簽名及合照，普多斯基當然係最受歡迎，佢亦有求必應簽到龍尾，熱情粉絲更幾乎逼跌圍欄，可見「王子」冧盡隊友及粉絲。

國際級巨星加盟，吸引過百名球迷睇勝利船操練。	位處聯賽中游嘅神戶勝利船想日職重開後改善排名，球員喺炎熱高溫下照樣落力操練。	日本人出名識得促銷，勝利船自然唔執輸，推出多款普多斯基紀念品。