冠忠南區新季望捧盃

冠忠南區昨日開操兼拜神，望新球季順順利利。

冠忠南區自2015至16年球季重返港超聯後，表現一向不俗，先後兩季分別取得第4及第3的排名，連續兩季殺入季後附加賽決賽，惟最後分別不敵傑志及東方龍獅，未能取得亞冠盃外圍賽的入場券。球會主席陳文俊表示，期望新季是球隊「收成期」：「球會自2002年成立，今年係15周年，兩年前重上港超聯，尚算磨合期，新季喺球衣品牌、水同體能支援方面都有新贊助商支持之下，期望會有少少收成，唔再只係耕耘。」

鄭兆聰：棄舊將係困難決定

今夏於港超轉會市場頗為活躍的冠忠南區，除簽入上季效力南華的陳文輝及車潤秋外，亦引入去季協助英甲球隊基寧咸成功護級的前巴基斯坦國家隊隊長列文，而另外兩位西班牙新援分別為防守中場馬天尼斯及翼鋒加洛斯。至於離隊球員則包括杜馬思、迪基圖、郭霆謙及內田智也。

陳文輝（左起）、馬天尼斯、列文、加洛斯及車潤秋5人加盟冠忠南區。	冠忠南區開操，點少得靚仔門將謝德謙。	球迷組織「南區死忠」親自撐場。

主教練鄭兆聰坦言，人腳調動的決定非易事：「放走杜馬思、內田智也及迪基圖等舊將，其實係個困難嘅決定，因為佢哋真係做得好好。不過位置問題令我唔能夠要杜馬思，至於迪基圖，佢係一個好勤力嘅前鋒，但佢只可以踢進攻中場，打唔到翼鋒，新兵加洛斯就3個位置都打到，呢個有時就係一個好困難嘅決定，可能對班舊將唔公平，但決定係為咗球隊嘅，始終都要做，搵呢班新球員返嚟當然希望球隊更進一步。」