波衫朝聖地大阪雙雄激鬥
日職場外各支球隊生財有道，周邊商品多不勝數，本報記者有幸於今周來到日本直擊，尋日第一時間來到著名球衣專門店Kamo大阪店朝聖。
櫻花全黑限定版型到震
由於呢間係大阪店，因此兩大同市死敵大阪飛腳及大阪櫻花分外受歡迎，甚至有個飛腳專賣區，而櫻花則與同屬PUMA贊助囑橫濱水手丶清水心跳及川崎前鋒，在7月20至30日推全黑限定版，櫻花黑衫配粉紅隊徽，型到震，但就要約14,000日圓（約973港元），都幾乸脷，店員稱飛腳老臣遠藤保仁及櫻花中場山口螢嘅波衫最暢銷。嚟緊周末日職重開上演大阪打吡，店內更搞咗個估邊隊贏嘅遊戲，球迷可用貼紙貼在板上預測場波嘅勝和負，暫時民意係飛腳秤先少少。
至於外國球隊方面，球迷版及落場版波衫價錢分別係約10,000（約695港元）及14,000日圓（約973港元），以皇馬及阿仙奴最具人氣。店內亦有部DIY鎖匙扣機，可揀選40隊日職或日乙球隊，打上想印上嘅名字，只係500日圓幾抵玩。除此之外，呢棟有4層嘅專門店，還有兒童部，連球證衫及佢哋用嘅神奇噴霧都有得賣，而樓梯猶如時光隨道，鑲起由1930至2010年世盃珍貴相片，絕對係粉絲打卡位。