4強止步 Marco感謝球迷打氣 奧蘇 羅拔臣今日爭霸

奧蘇里雲坦言打出職業生涯最瘋狂嘅比賽。

（Now 637周日下午2時起直播）

首場比賽只能險勝希堅斯而晉級的「火箭」，在準決賽中表現有改善，極速入局兼「起迫」，於第2局打出一Cue128度，並將局數拋離至3比0。不過「準神」卓林普亦並非浪得虛名，在第4局打出賽事至今最高度數的136度扳回一城。這位世界第3的球手於休息後一口氣連取3局反超前，但「火箭」頂住壓力於第10局「起迫」126度再次追平，令賽事要激戰至最後一局！最終奧蘇里雲於最後一局後上贏出，進身冠軍爭霸戰。令全場球迷瘋狂的奧蘇里雲賽後稱：「最後一局前，我都冇諗過自己可以打決賽，仲諗住決賽可以做觀眾睇波。但我一路都好正面去打，最後可以贏波，呢場比賽可以話係我打波以嚟最瘋狂嘅一場比賽！」

有「墨爾本機器」之稱的羅拔臣就於另一場4強賽事贏出，他一度落後「Wonder爸」傅家俊之下，最終以局數6比4逆轉，將與奧蘇里雲於今晚7時爭逐冠軍；而「四眼Cue后」吳安儀與亨特利及韋德的表演賽，就會於今午2時展開。

傅家俊下周飛英國備戰世界賽

淘汰傅家俊之後，羅拔臣笑指要向香港球迷「Say sorry」，獲得球迷報以掌聲回應，Marco就指比賽贏輸好正常：「2013年澳洲公開賽我都喺佢主場贏佢捧盃，今次只係有來有往。雖然觀眾畀動力我打得更好，但羅拔臣防守做得較好，令我每次埋枱都面對好大難題。」Marco亦透露會自己接下來的計劃：「我下星期會飛到英國，先抽時間陪家人，然後投入訓練，準備8月嘅世界公開賽外圍賽及中國錦標賽。」

羅拔臣打出精彩一役淘汰傅家俊。	傅家俊最希望香港成功舉辦排名賽。	吳安儀同球迷玩自拍。