高普遙距轉會 紅軍簽侯城左閘

完成收購後，高普透過官網大讚呢位新兵：「今次對羅拔臣嚟講係足球生涯一大突破，如果你同佢傾過偈，就會明白佢點解可以進步神速，佢非常熱愛足球，而且態度一流，佢嘅技術同天資非常高，加上有英超比賽經驗，未來一定可以踢得更加好。」

「紅軍」加強防線嘅工作仲未完結，修咸頓嘅荷蘭中堅華基爾雲迪積克，一直係利物浦收購目標，雖然修咸頓企硬唔賣，早前甚至控告利物浦非法斟介，逼到「紅軍」要出道歉聲明。

雲迪積克罷操博投紅軍

不過華基爾雲迪積克仍未死心，走去玩罷操逼修咸頓放人，修咸頓證實呢位中堅自稱「唔能夠練波同比賽」，因此被下令單獨操練，「聖人」新帥比歷連奴表示：「雲迪積克話自己唔可以練習，因為佢決心離隊，既然佢未準備好，我就安排佢自己操練。」據報華基爾雲迪積克表明只想加盟利物浦。