準神發威卓林普篤走梅菲
「準神」卓林普與「魔術師」梅菲昨日於頭場率先交手，狀態大勇的卓林普首節已迅速入局，中遠枱機會都能輕鬆把握，次局更「起迫」打出100度，令梅菲首節「坐多過企」，首節落後局數1比3。第2節卓林普繼續表現穩定，最終贏局數5比3晉級準決賽。
雖然今仗卓林普盡顯「準神」本色，但焦點就落在球證陳榮忠身上，他多次在球手罰分後，未能將白波重擺至原來位置，更一度要卓林普及梅菲出言指正，引起球迷熱烈討論。
球證擺波甩轆 梅菲話冇問題
賽後兩位球手都認為球證問題不大，梅菲更為佢哋講好說話：「我覺得球證做得唔錯，雖然佢有少少失誤，但如果我叫你在3,000人面前，仲要對住直播做球證，你都會失手啦！好似足球同網球咁，球證都成日犯錯，我覺得普遍來說桌球球證係做得最好，就係因為他們少機會犯錯，所以當他們偶有失手就會畀人放大。」