西布朗一班球員可以說是「最佳員工」，原來完成周三賽事後，周四早上包括隊長莊尼伊雲斯等球員齊齊北上，出席球會中資老闆賴國傳於深圳舉行的記者會，昨日球會主席約翰威廉斯又安排球員操練後，同英國來港捧場的球迷見面，球員真係球場內外都忙個不停。
西布朗是今次英超亞洲盃第一支抵埗的球隊，當另外3隊仍然搭緊飛機來香港時，他們已經開始在酒店健身室練體能，於周三首日賽事前一日又操兩課，其中一課是朝早6點半，真係天未光已經要起身。周三比賽後球員拿拿聲返酒店，原來有半隊人要到深圳出席老細活動。
賴國傳是棕櫚集團老細，成立了棕櫚體育，周四於深圳舉行記者會，西布朗多名球員包括莊尼伊雲斯、占士摩利臣、耶高比及阿倫尼安等球員都去撐場，早上晚落即日來回，都咪話唔攰，但原來「畀面派對」陸續有嚟。
球隊昨午進行賽前操練，操練完畢後，領隊佩尼斯透露，球會主席約翰威廉斯安排從英國遠道而來的球迷，跟球員在酒店茶敍及見面，以答謝他們的支持，唔知班球員體力咁透支，會唔會影響場上表現呢？