高普香港派定心丸：古天奴係非賣品！

消息指出，巴塞隆拿睇中菲臘比古天奴，希望他成為恩尼斯達的接班人，高普在記招被問到此傳聞，即斬釘截鐵表示：「是的（古天奴是非賣品）！呢個立場唔係今日或尋日先至有，古天奴一直都係球隊非常重要一員。」

「我哋唔係一間賣人嘅球會」

高普之後補充：「其他球會打利物浦球員主意，唔會令我覺得驚奇，但我想傳達一個好重要嘅訊息，我哋唔係一間賣人嘅球會！」

菲臘比古天奴（右）尋日積極練波，冇受挖角傳聞影響。

高普（左）對粉絲有求必應。

古天奴嘅話題成為記者會重點之一，有份出席記招嘅拉爾拉拿亦有信心「古仔」會留低：「利物浦將會有好大嘅成就，古天奴會係當中一分子，佢已經躋身球壇精英行列，同時亦可以喺利物浦實現偉大嘅目標。如果利物浦想贏英超同埋歐聯冠軍，古天奴呢啲球員一定要留低。」

2毫子牛油妙論轉會費癲升

事實上，利物浦上季先至同25歲嘅菲臘比古天奴續約，新約要到2022年先至屆滿，「紅軍」絕對冇需要賣走這位巴西國腳。高普強硬回應巴塞隆拿後，被《BBC》記者問到現今球員轉會費瘋狂飊升的現象，則拋出「牛油論」回應：「不止是球員，我細個用2毫子就買到牛油啦！」盡展風趣一面。