季軍戰唔Hea踢 西布朗水晶宮為港粉搏盡！
英超亞洲盃今晚「煞科」，頭場季軍戰由西布朗對水晶宮，賽前雙方領隊均向旗下新兵舊將投予信心一票，並期望合演一場好波，答謝熱情的香港球迷。
（Now 621周六晚6時直播）
法帥避談賓迪基走人
周三（19日）初賽90分鐘法定時間與李斯特城踢成1比1，最後射輸12碼的西布朗，領隊佩尼斯賽後表示對球隊發揮感滿意，認為大家都十分珍惜季前與強手拍跳的機會，就算今日僅能競逐季軍戰，也是一個練兵良機：「球隊上場雖然射輸12碼，但慶幸冇出現傷兵，球隊陣上亦有唔錯發揮，好敢去用波，全部都做到我嘅要求。」
佩尼斯在鬥水晶宮前，特別點名稱讚2名新兵，希望球迷可以給予支持，他謂：「司職中堅嘅希加斯上場表現得好好，嚟自埃及嘅佢講英文冇問題，同隊友溝通到，可以好快融入球隊；前鋒積洛迪古斯傷咗一段日子，佢好努力去證明自已，值得大家畀多啲支持佢！」上場12碼決勝出現「蝦碌」的門將賓科士打，笑言自己那記表現「好垃圾」，並傾向舊有的互射12碼方式，認為今次賽事採用的「ABBA」制感覺很奇怪。
至於水晶宮領隊法蘭迪保亞，同樣滿意旗下戰將在首天賽事的演出，認為兩星期以來苦練「343」陣式，得出不俗的效果，很有信心在新一個英超球季，可以交出更佳表現。對於有傳比利時國腳賓迪基將會離隊，法蘭迪保亞未有正面回應，但昨於賽前記招就指着身旁的賓迪基表示：「嚟緊仲會羅致多幾名球員，但球隊已經有一個好重要嘅球員喺度！」